रामेछाप । रामेछाप नगरपालिकाले किसानहरुलाई कृषि पेशातर्फ उन्मुख गर्न एकघर एक पशु विमा कार्यक्रमको अभियान शुरुवात गरेको छ ।
रामेछाप नगरपालिकाले गएको आर्थिक वर्ष २०७६÷७७ बाट पालिका भित्रका वडा नं ७, ८ र ९ गरि तीनवटा वडाका किसानहरुले पालेका पशुको निःशुल्क रुपमा विमा कार्यक्रम अघि वढाएको हो । गएको आर्थिक वर्षवाट शुरु गरेको यो अभियान पालिकाले ९ वटै वडामा पुर्याउने गरि काम अघि वढाएको छ । पशु विमा गर्न रामेछापका एनएलजी इन्सुरेन्स कम्पनी लिमिटेड र प्रिमियर इन्सुरेन्स कम्पनीलाई जिम्मा दिएको छ । किसानले पालेका पशुको निःशुल्क रुपमा विमा कार्यक्रम गरिदिएपछि किसानहरु आकर्षित भएको रामेछाप नगरपालिका वडा नं–७ सुकाजोरका किसान पूर्णवहादुर खत्रीले जानकारी दिए ।
उनले भने– नगरपालिकाले शुरु गरेको यो अभियान किसानको लागि एकदमै राम्रो छ । तर एकघर एक पशु मात्रै विमा गर्ने काम भयो । यसलाई बढाएर किसानले पालेका सबै पशुको विमा गरिदिए किसानहरुलाई थप सहज हुने थियो । पालिकाले सबै पशुको विमा गर्न सकेन भने बरु किसानहरुले कति प्रतिशत रकम ब्यहोर्नुपर्ने हो त्यो गर्न आफुहरु तयार रहेको खत्रीले जानकारी दिए ।

किसानहरुले पालेको पशुको विमा गराउन थोरै रकम लाग्ने र पछि किसानको पशु विभिन्न रोग लागेर मरेमा विमा गरेको रकम सहजै भुक्तानी लिन सक्ने भएकाले पनि किसानहरुले आफुले पालेको सवै पशुको विमा गराउन सके झनै फाइदा पुग्ने एनएलजी इन्सुरेन्स रामेछापका प्रमुख मोहन धमालाले जानकारी दिए ।
उनले भने– रामेछाप नगरपालिकाका केही वडाका किसानहरुको पशु विमा हामीले गराएपछि केही पशुहरु विरामी परेर मरे । मरेका केही पशुहरुको विमा रकम बापतको रकम समेत हामीले सम्वन्धित पालिकाको रोहवरमा किसानलाई हस्तान्तरण गरेका छौं । यसवाट पनि अन्य किसानहरुलाई आफुले पालेको पशुको विमा गराउनु पर्ने रहेछ भन्ने अनुभुती बढेको छ प्रमुख धमालाले बताए ।
रामेछाप नगरपालिकाले भने आगामी वर्षवाट किसानले पालेका सवै पशुहरुको बिमा गराउने गरि योजना अघि वढाउने जनाएको छ । पालिकाले पहिलो चरणमा परिक्षणको क्रममा गरेको यो कार्यक्रम प्रभावकारी भएको भन्दै आगामी वर्ष यसलाई थप निरन्तरता दिदै अघि बढाउने र आवश्यक वजेटको समेत व्यवस्थापन गर्ने रामेछाप नगरपालिकाका प्रमुख प्रशासकिय अधिकृत रामचन्द्र लामगादेले जानकारी दिए ।