भ्रष्टचार विरुद्धको अभियानले देशलाई सुशासनयुक्त बनाउन माग गरेको छ । शनिबार रामेछापको सदरमुकाम मन्थलीमा पत्रकार सम्मेलनको आयोजना गरी अभियानले यस्तो माग गरेको हो ।
अभियानका अध्यक्ष यम बहादुर थापाले भ्रष्टाचार र विथिति बिरुद्ध जेनजीले गरेको आन्दोलन र यसको सफलताको प्रशंसा गर्दै यो आन्दोलनबाट बनेको सरकारलाई सुशासन कायम राख्न आग्रह गरे । उनले केपी ओलीको सरकार भ्रष्टचारमा लिप्त भएकोले जनताले फालेको बताउदैँ अहिले बनेको सरकारले भने सुशासन र समृद्धिमा जोड दिनुपर्ने बताए ।
उनले २०४६ साल देखिका विभिन्न पद तथा अहोदामा पुगेका नेता, कर्मचारी तथा विभिन्न व्यक्तिहरुको सम्पत्ति छानविन गर्नु पर्ने माग गरे । त्यस्तै मन्त्री, सांसद, नेता तथा कर्मचारीहरुले भ्रष्टचार गरेको र विदेशमा राखेको पैसा नेपाल ल्याउन नवनिर्मित सरकारसमक्ष माग गरेका छन् ।
अध्यक्ष थापाले भ्रष्टचार विरुद्धको अभियानलाई थप सशक्त बनाई सुशासन कायम गर्न सरकारलाई सहयोग गर्ने प्रतिबद्धता समेत व्यक्त गरेका छन् । साथै, जेन जी आन्दोलनमा शाहदत प्राप्त गरेका व्यक्तिहरुलाई शहीद घोषणा गर्न र घाइतेको उपचारमा सरकारलाई गम्भीर हुन अध्यक्ष थापाले अनुरोध गरेका छन् । अभियानले स्थिर सरकार, शान्ति सुरक्षा, रोजगारी, निःशुल्क शिक्षा–स्वास्थ्य जस्ता प्रमुख माग पनि अघि सारेको छ ।
सम्मेलनमा शिक्षाविद् गुञ्जबहादुर श्रेष्ठले पूर्व प्रधानान्याधिश सुशिला कार्की नेतृत्वको सरकारले जनताको मन जित्ने काम गर्नेमा विश्वस्त रहेको बताए । उनले इमानदार र जनताप्रति बफादार रहेर काम गरेको भए यसअघिको सरकार फालिनु नपर्ने धारणा राखे । पत्रकार सम्मेलनमा जिल्लाका सबै सञ्चारकर्मीहरुको सहभागिता रहेको थियो ।