रामेछाप । नत कहीँ आधिकारीक संस्था दर्ता छ, नत अभियानमा साथ कसैले दिएका छन् । यसरी व्यक्तिगत अभियान चलाउँदै आएका मन्थली नगरपालिका–३ ठुलीमदौका यमबहादुर थापाले विद्यालयको पठनपाठन दुईहप्ता देखी प्रभावित पार्दै आएका छन् ।
कोरोना महामारीका कारण लामो समयसम्म बन्द रहेका जिल्लाका सामुदायिक विद्यालयहरु बल्लतल्ल कोरोना संक्रमितको संख्या कमी भएसँगै विद्यालय खुलेका थिए । विद्यालय बन्द हुँदा पढाई प्रभावित भएका बालबालिकाहरुका बार्षिक परीक्षा आउन थोरै समय मात्रै बाँकी छ । विद्यालयले कोर्ष सक्न हम्मेहम्मे परेको समयमा शिक्षकहरुले पढाउन छाडेर व्यक्तिगत कार्यक्रमलाई प्राथमिकता दिन थालेपछि बालबालिकाहरुको पढाई नै प्रभावित हुन पुगेको हो ।
जिल्लामा भ्रष्टाचार मौलाएको भन्दै भ्रष्टाचारको अभियान लिएर सामुदायिक विद्यालय पुगेका थापाले विद्यालयका कलिला बालबालिकाहरु जम्मा गरेर भाषण ठोक्दै हिड्ने गरेका छन् । अभियानको नाममा थापाले विद्यालयका बालबालिकाहरु जम्मा गराएर बेन्च माथि चढेर भाषण दिने र आफ्नो अभियान सफल भएको बताउँदै आएका छन् ।
अभियान लिएर सामुदायिक विद्यालय पुगेका अभियान्ताको संस्था कुन कार्यालयमा दर्ता छ । आधिकारीक संस्था हो वा होइन रामेछापका कुनै पनि विद्यालयलका शिक्षकहरुले खोजतलास गरेनन् । बरु उल्टै पढाई रहेका शिक्षकले कक्षा छाडेर बालबालिकाहरुलाई बाहिर खुल्ला चउरमा निस्कन उत्प्रेरणा गर्दै आएका छन् । अभियान लिएर आएका व्यक्ति ठूलै संस्थाका हुन की भन्ने भएर विद्यालयका पढाई छाडेर बालबालिकालाई उक्त अभियानमा उपस्थित गराएको श्री सेतीदेवी माबिका एक शिक्षकले बताए । उनले भने– हामीले उनको सस्ंथा दर्ता छ वा छैनन् केही सोधेनौं ।
अभियानको नाममा विद्यालयको पठनपाठन प्रभावित हुने काम तत्काल बन्द गर्नुपर्ने मन्थली नगरपालिकाका प्रमुख रमेशकुमार बस्नेतले जानकारी दिए । उनले भने– नत कहीँ आधिकारीक रुपमा संस्था दर्ता छ, नत यस बिषयमा मन्थली नगरपालिकासँग कुनै अनुमती नै लिएको छ । पालिकाको अनुमती विना सामुदायिक विद्यालयको पढाई प्रभावित हुने काम गर्न कसैलाई छुट छैन् ।
विद्यालयको पढाई प्रभाबित बनाएर कार्यक्रम गर्न दिनु गलत भएकाले तत्काल उक्त कार्य बन्द गरी विद्यालयको पढाई सुचारु गर्न सम्वन्धित विद्यालयलाई निर्देशन दिएको मन्थली नगरपालिका शिक्षा शाखाका प्रमुख हेमन्त बुढाथोकीले जानकारी दिए । उनले भने– विद्यालयको पठनपाठन प्रभावित हुने कुनै पनि कार्य गर्न पाइदैन । कार्यक्रम नै गर्ने हो भने सम्वन्धित व्यक्तिले नगरपालिकासँग अनुमती लिनु पर्ने र त्यसका लागि संस्था दर्ताको आधिकारीक कागजात समेत पेश गर्नुपर्ने शिक्षा शाखा प्रमुख बुढाथोकीले बताए ।
