काठमाडौँ । भोली देखी काठमाडौँको प्रमुख पर्यटकीय क्षेत्र ठमेल र दरबारमार्ग २४ सैँ घण्टा खुल्ला हुने भएको छ । बिहीबार ठमेल पर्यटन विकास परिषद् र दरबारमार्ग विकास बोर्डले संयुक्त पत्रकार सम्मेलन गर्दै नयाँ वर्ष अर्थात वैशाख १ गतेदेखि ठमेल र दरबारमार्ग २४ सै घण्टा खुल्ला गरिने घोषणा गरेका हुन् ।
आर्थिक मन्दीको चपेटामा परेको उद्योग व्यवसायलाई चलायमान बनाउन र शिथिल अवस्थामा रहेको आर्थिक क्रियाकलापलाई चलायमान बनाउनका लागि पनि व्यावसायिक क्षेत्र सधैँ खुल्ला राख्नुपर्ने बताउँदै सबैको साथ र सहयोगमा खुल्ला गरिएको व्यवसायीहरूले बताएका छन् । आर्थिक क्रान्ति र ठुला सपनाले भरिएको सहर सुत्नु हुँदैन भन्ने सर्वमान्य कुरालाई आत्मसात् गर्दै सबै व्यापार व्यवसायीहरूलाई ठमेल र दरबारमार्ग क्षेत्रमा व्यवसाय सञ्चालन गरेर सहयोग गर्न समेत सङ्घले आग्रह गरेको छ ।यस्तो सेवा ठमेल र दरबारमार्ग हुँदै क्रमशः अन्य क्षेत्रमा समेत खुल्ला गरिने व्यवसायीहरूले बताएका छन् ।
नयाँ वर्षको उपलक्ष्यमा उपप्रधान एवं गृहमन्त्री रवि लामिछानेले ठमेल र दरबारमार्ग बजार क्षेत्र २४ सैँ घण्टा व्यवसाय सञ्चालनको घोषणा गर्नेछन् । सुरक्षा र अन्य व्यवस्थापनको जिम्मेवारी जिल्ला प्रशासन कार्यालय (काठमाडौँ)ले लिनेछ । सबै सरोकार वाला सँगको राय सुझावका आधारमा पूर्णकालीन व्यवसाय सञ्चालन सम्बन्धी सुरक्षा व्यवस्थापन मापदण्ड बनाइएको छ । परिषद् र बोर्डले जिल्ला प्रशासन कार्यालय काठमाडौँले बनाएको आचारसंहिता बमोजिम कानुनको परिधिभित्र रहेर व्यवसायीले दरबारमार्ग र ठमेलमा २४ सै घण्टा व्यवसाय सञ्चालन गराउने जनाएका छन् ।
अहिले ठमेलमा मात्रै ८ हजार भन्दा बढी व्यवसायमा ६० हजारले रोजगारी पाएका छन् भने दरबारमार्गमा करिब २ सय व्यवसायी रहको र करिब ७ हजार भन्दा बढीले रोजगारी पाएका छन् ।
