काठमाडौँ । नेकपा एमालेका वरिष्ठ उपाध्यक्ष ईश्वर पोखरेलले जननेता मदन भण्डारीको ७५ औँ जन्मजयन्ती भव्य र व्यवस्थित ढंगले मनाउनका लागि सम्पर्क कार्यालय स्थापना गरिएको बताएका छन्।
काठमाडौँको थापागाउँमा कार्यालय उद्घाटन कार्यक्रममा सम्बोधन गर्दै उनले उक्त कार्यालय मदन भण्डारी फाउन्डेशनद्वारा गठन गरिएको आयोजक समितिले आफ्नो गतिविधि व्यवस्थित गर्न स्थापना गरेको स्पष्ट पारे।
‘जननेता मदन भण्डारीको ७५ औँ जन्मजयन्ती मनाउने सिलसिलामा आयोजक समितिले कामलाई व्यवस्थित बनाउन कार्यालय स्थापना गरेको हो। यही कार्यालय हो,’ पोखरेलले भने।
उनका अनुसार समितिले भण्डारीको विचार र ऐतिहासिक भूमिकालाई विश्व मञ्चमा पुर्याउने दीर्घकालीन उद्देश्य राखेर कार्यालय स्थापना गरेको छ।
‘मैले बुझेको कुरा के हो भने, यो कार्यालयले आउने दिनमा जननेता मदन भण्डारीका विचार र उहाँको ऐतिहासिक योगदानलाई विश्व रंगमञ्चमा पुर्याउने लक्ष्य राखेको छ। त्यसअनुसार सफलताको कामना गर्दछु,’ उनले भने।
पोखरेलले एमाले अध्यक्ष केपी शर्मा ओलीको नेतृत्वमा विचारको प्रखरता अघि बढाउँदा फाउन्डेशनले महत्वपूर्ण योगदान दिएको पनि स्मरण गरे।
‘अध्यक्ष ओली विचारको झण्डा बोकेर अघि बढ्नुभएको बेला नै फाउन्डेशनले सामिप्यता पाएर महत्त्वपूर्ण भूमिका खेल्दै आएको थियो,’ उनले भने।
