भारतका विदेशमन्त्री एस जयशंकरले शनिबार सामाजिक सञ्जालमा पोस्ट गर्दै भारत र पाकिस्तान आज गोलीबारी र सैन्य कारबाही रोक्न सहमत भएको बताएका छन्।
विदेशमन्त्री एस जयशंकरले आफ्नो पोस्टमा लेखेका छन्,‘भारतले सबै प्रकारका आतंकवाद विरुद्ध निरन्तर कडा र अटल अडान लिएको छ। यो जारी रहनेछ।’
यसअघि अमेरिकी राष्ट्रपति डोनाल्ड ट्रम्पले भारत र पाकिस्तानबीच तत्काल पूर्ण युद्धविरामको सम्झौता भएको बताए।
पाकिस्तानका उपप्रधानमन्त्री इशाक दारले पनि युद्धविराममा सहमति भएको पुष्टि गरे।
पाकिस्तानका उपप्रधानमन्त्रीले के भने ?
यसैबीच, पाकिस्तानका उपप्रधानमन्त्री तथा विदेशमन्त्री इशाक दारले पाकिस्तान र भारत पूर्ण तत्काल युद्धविराममा सहमत भएको बताए।
इशाक दारले भने,‘पाकिस्तान र भारतले तत्काल लागू हुने गरी युद्धविराममा सहमति जनाएका छन्। पाकिस्तानले सधैं आफ्नो सार्वभौमसत्ता र क्षेत्रीय अखण्डतामा सम्झौता नगरी यस क्षेत्रमा शान्ति र सुरक्षा चाहेको छ।’
भारत र पाकिस्तानबीच पछिल्लो २४ घण्टामा तनाव निरन्तर बढिरहेको र भारतले पाकिस्तानमाथि लामो दूरीको उच्च गतिको क्षेप्यास्त्र प्रयोग गरेको समयमा युद्धविराम सम्झौताको खबर आएको हो।
भारतका विदेश सचिवले के भने ?
युद्धविराममा भएको सम्झौताको बारेमा जानकारी दिँदै भारतका विदेश सचिव विक्रम मिश्रीले दुवै पक्षले सैन्य कारबाही र गोलीबारी रोक्न निर्देशन जारी गरेका छन्।
उनले भने, ‘पाकिस्तानको सैन्य अपरेशनका महानिर्देशकले आज दिउँसो ३ः३५ बजे आफ्नो भारतीय समकक्षीलाई फोन गरे। आज साँझ ५ बजेदेखि दुवै पक्षले जमिन, समुद्र र हवाई फायरिङ बन्द गर्ने सहमति भएको छ।’
उनले दुवै देशका सैन्य अपरेशनका महानिर्देशकले सोमबार फेरि वार्ता गर्ने बताए।
डोनाल्ड ट्रम्पले के भने ?
शनिबार डोनाल्ड ट्रम्पले सामाजिक सञ्जालमा एक पोस्टमा भनेका छन्,‘भारत र पाकिस्तान पूर्ण तत्काल युद्धविराममा सहमत भएका छन्।’
ट्रम्पले आफ्नो सामाजिक सञ्जालमा पोस्टमा भने, ‘संयुक्त राज्य अमेरिकाको मध्यस्थतामा लामो समयसम्मको वार्ता पछि म यो घोषणा गर्न पाउँदा खुसी छु कि भारत र पाकिस्तान पूर्ण र तत्काल युद्धविराममा सहमत भएका छन्।’
अमेरिकी विदेशमन्त्री मार्को रुबियोले सामाजिक सञ्जालमा पोस्ट गर्दै भारत र पाकिस्तानले व्यापक मुद्दाहरूमा वार्ता सुरु गर्न सहमत भएको बताए।
उनले लेखे,‘भारत र पाकिस्तानले तत्काल युद्धविराम गर्न र तटस्थ स्थानमा व्यापक मुद्दाहरूमा छलफल गर्न सहमत भएका छन्।’
उनले लेखे,‘हामी शान्तिको बाटो रोज्ने सन्दर्भमा प्रधानमन्त्री मोदी र शरीफको बुद्धिमत्ता, विवेक र कूटनीतिको कदर गर्छौं।’
