रामेछाप ः श्रीलङ्काको कोलम्बोस्थित प्रेमदास स्टेडियममा भएको खेलमा भारत ए लाई नेपालले १ सय ६८ रनको चुनौती दिएको छ । नेपालले टस जितेर पहिला ब्याटिङ थालेको थियो । नेपाल ३९ दशमलव २ ओभरमा १६७ रनमा अल आउट भएको हो ।
नेपालका लागि कप्तान रोहित पौडेलले अर्धशतकीय पारी खेले । उनले ८५ बलमा ६५ रन जोडे । गुम्सन झाले ३० बलमा ३८ रनको महत्वपूर्ण योगदान गरे । उनले २ छक्का र २ चौका प्रहार गरे ।
देव खनालले १५, सोमपाल कामीले १४, आसिफ शेख ७, पवन सर्राफ ६‚भीम सार्कीले ४ र ललित राजवंशीले ३ रन बनाउँदा कुशल भुर्तेल र कुशल मल्ल शून्यमा आउट भए । किशोर महतो २ रनमा नट आउट रहे ।
भारत ए का लागि निशान्त सिन्धुले सर्वाधिक ४, राजवर्धक हंगारगेकरले ३, हर्षित रानाले २ र मानव सुथरले १ विकेट लिए । भारत लगातार दोस्रो जितको खोजीमा छ । भारतले पहिलो खेलमा युएईलाई ८ विकेटले पराजित गरेको थियो । अघिल्लो चरण प्रवेशको सम्भावना कायम राख्न नेपाललाई आज जित्नै पर्ने दबाब छ ।
