काठमाडौं । प्रधानमन्त्री केपी शर्मा ओलीलाई भारत भ्रमणको औपचारिक निमन्त्रणा दिन भारतीय विदेश सचिव विक्रम मिश्री आज बिहान काठमाडौं आएका छन्। परराष्ट्र सचिव अमृतबहादुर राईको निमन्त्रणामा आएका मिश्रीले आजै प्रधानमन्त्री ओलीलाई भारतीय प्रधानमन्त्री नरेन्द्र मोदीको तर्फबाट निमन्त्रणा हस्तान्तरण गर्नेछन्।
मिश्रीले काठमाडौं बसाइका क्रममा राष्ट्रपति रामचन्द्र पौडेल, प्रधानमन्त्री ओली, परराष्ट्रमन्त्री आरजु राणा, नेपाली कांग्रेस सभापति शेरबहादुर देउवासहित उच्चपदस्थ नेताहरूसँग भेटवार्ता गर्ने कार्यक्रम छ। शीतलनिवास पुगेर राष्ट्रपति पौडेलसँग भेटेपछि उनले परराष्ट्र मन्त्रालयमा दुई पक्षीय वार्ता गर्नेछन्।
भेटवार्तामा नेपाल–भारत साझेदारीका विभिन्न पक्षमा छलफल हुने जनाइएको छ। उच्चस्तरीय भेटवार्ता सकिएपछि मिश्रीले पशुपतिनाथको दर्शन गरेर स्वदेश फर्किने कार्यक्रम छ।
भारतीय विदेश मन्त्रालयले परराष्ट्र सचिवको आसन्न भ्रमणलाई दुवै देशबीच हुने नियमित उच्चस्तरीय आदान–प्रदानको परम्पराको निरन्तरता भएको उल्लेख गर्दै यसले द्विपक्षीय सम्बन्धलाई अझ प्रगाढ बनाउने विश्वास व्यक्त गरेको छ।
प्रधानमन्त्री ओली यही भदौ ३१ गते दुईदिने भारत भ्रमणमा जाने कार्यक्रम रहेको छ। यसपटक ओली र मोदीबीच बिहारको बोधगयामा औपचारिक भेटवार्ता गर्ने तयारी भएको छ।
