नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) ले सवारी साधन खरिदमा ८० प्रतिशतसम्म कर्जा र २० प्रतिशत मात्र डाउन पेमेन्टको व्यवस्था गर्न सरकारसँग माग गरेको छ। अध्यक्ष रितु सिंह वैद्यको नेतृत्वमा गएको टोलीले अर्थमन्त्री डा. स्वर्णिम वाग्लेलाई भेटेर अटोमोबाइल क्षेत्रलाई ‘विलासिता’ नभई ‘आवश्यकता’ को रूपमा मान्यता दिन र वित्तीय पहुँच सहज बनाउन आग्रह गरेको हो।
भेटका क्रममा नाइमाले विद्युतीय र हाइब्रिड सवारीका लागि स्थिर नीति, कर संरचनामा सुधार र ‘मेक इन नेपाल’ अन्तर्गत एसेम्बलिङ उद्योगलाई प्रवर्द्धन गर्नुपर्नेमा जोड दिएको छ। साथै, भन्सार जाँचपास र लेखापरीक्षणमा हुने दोहोरो व्याख्याले व्यवसायीलाई मर्का परेको भन्दै पारदर्शी प्रणालीको माग समेत गरिएको छ। नाइमाको प्रतिनिधिमण्डलले भौतिक पूर्वाधार तथा यातायातमन्त्री सुनिल लम्सालसँग पनि भेट गरी यातायात ऐनको पुनरावलोकन र डिजिटल प्रणाली एकीकरणका विषयमा छलफल गरेको छ।
