काठमाडौं — १५ औं केन्द्रीय राष्ट्रपति रनिङ खेलकुद प्रतियोगितामा बागमती प्रदेशले उत्कृष्ट प्रदर्शन गर्दै समग्र टिम च्याम्पियनको उपाधि हासिल गरेको छ। बागमतीले ३६ स्वर्ण, ७ रजत र ११ कांस्य पदक जित्दै ७ प्रदेशबीच पहिलो स्थान हासिल गर्यो।
युवा तथा खेलकुद मन्त्रालयको संयोजन र राष्ट्रिय खेलकुद परिषद् (राखेप) को आयोजनामा भएको प्रतियोगितामा गत संस्करणको विजेता सुदूरपश्चिम प्रदेश दोस्रो स्थानमा सीमित भयो। सुदूरपश्चिमले १४ स्वर्ण, २० रजत र १८ कांस्य पदक जितेको थियो। ११, १२ र १३ औं संस्करणको विजेता लुम्बिनी प्रदेश तेस्रो स्थानमा रहयो, जसले ५ स्वर्ण, १३ रजत र १५ कांस्य पदक हात पार्यो।
अन्य प्रदेशहरूमा गण्डकी प्रदेशले ४ स्वर्ण, ११ रजत र १७ कांस्यसहित चौथो, कर्णाली प्रदेश ४ स्वर्ण, ६ रजत र १९ कांस्यसहित पाँचौं, मधेश प्रदेश ३ स्वर्ण, २ रजत र १० कांस्यसहित छैटौं स्थानमा रह्यो। स्वर्णविहीन कोशी प्रदेश सातौं स्थानमा रहेर ७ रजत र ८ कांस्य पदक जित्यो।
प्रतियोगितामा एथलेटिक्स, भलिबल, कबड्डी, कराते, उसु र तेक्वान्दो गरी ६ खेलमा ६ सय ८६ खेलाडीहरूले प्रतिस्पर्धा गरेका थिए। तीन दिन चलेको प्रतियोगितामा ६६ स्वर्ण, ६६ रजत र ९८ कांस्य पदकका लागि प्रतिस्पर्धा भएको थियो। यस क्रममा ९ नयाँ जुनियर राष्ट्रिय कीर्तिमान समेत स्थापित भए, जसका लागि प्रत्येकलाई १० हजार रुपैयाँ नगद पुरस्कार प्रदान गरियो।
राखेपका उपाध्यक्ष ध्रुव आचार्य, सदस्य–सचिव टंकलाल घिसिङ, कार्यकारी समितिका सदस्यहरू कमलबहादुर भट्टराई, रञ्जना प्रधान र सुवर्ण श्रेष्ठ, सदस्य जगतसिंह धामी, प्रशासन विभाग प्रमुख भोजानन्द राई, खेलकुद प्रतियोगिता तथा योजना विभाग प्रमुख मिनकुमार शर्मालगायतले विजेतालाई सम्मानित गरे।
कुल पदक विजेतालाई १२ लाख रुपैयाँ नगद पुरस्कार वितरण गरिएको थियो ।
