हेटौँडा — नेपाली कांग्रेस बागमती प्रदेश संसदीय दलले दलका नेता तथा मुख्यमन्त्री इन्द्रबहादुर बानियाँलाई विश्वासको मतको पक्षमा मतदान गर्न सदस्यलाई ह्विप जारी गरेको छ। प्रदेश सभा सचिवालयले २७ साउन दिउँसो ४ बजेको लागि बैठक आह्वान गरिसकेको छ, जसमा बानियाँले नेपालको संविधानको धारा १६८(४) र प्रदेश सभा नियमावली २०७४ को नियम १४३(१) अनुसार विश्वासको मत लिनेछन्।
शनिबार ललितपुरको भैँसेपाटीस्थित मुख्यमन्त्री निवासमा बसेको कांग्रेस संसदीय दलको बैठकले तीन बुँदे ह्विप जारी गर्ने निर्णय गरेको प्रवक्ता सुरजचन्द्र लामिछानेले जानकारी दिए। ती बुँदामा बैठकमा अनिवार्य उपस्थित हुने, तटस्थ नबस्ने र विश्वासको मतको पक्षमा मतदान गर्ने प्रावधान रहेका छन्।
बैठकमा ९ सदस्यीय कार्यसमिति गठन गर्दै लामिछानेलाई प्रवक्ता तोकिएको छ भने छिरिङ दोर्जे लामा र विनु रायमाझी पौडेलसहितको तीन सदस्यीय अनुशासन समिति पनि बनाइएको छ। आगामी २७ साउन दिउँसो १ बजे दलको अर्को बैठक हेटौँडामा बस्ने निर्णय गरिएको छ।
यसैबीच, बानियाँको नेतृत्वमा भैँसेपाटीमा दलको बैठक भइरहँदा निवर्तमान मुख्यमन्त्री बहादुरसिंह लामा पक्षले काठमाडौंमा छुट्टै बैठक गरेको छ। लामा पक्षले २० साउनमा भएको सहमतिअनुसार आफ्ना तीन सदस्यलाई मन्त्री पद नदिएको भन्दै असन्तुष्टि जनाउँदै आएको छ।
