हेटौंडा,- रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत तथा पुनर्स्थापनामा सहयोग पुर्याउन नेपाली कांग्रेस बागमती प्रदेश कार्यसमितिले ५ लाख ५५ हजार ५ सय ५५ रुपैयाँ सहयोग गर्ने निर्णय गरेको छ ।
कांग्रेस बागमती प्रदेश कार्यसमितिको बैठकले उक्त रकम नेपाली कांग्रेसको विपद् व्यवस्थापन कोषमा जम्मा गर्ने निर्णय गरेको हो । उक्त रकम प्रधानमन्त्री दैवी प्रकोप उद्धार कोषमा सहयोग पुग्ने गरी उपलब्ध गराइने कांग्रेसले जनाएको छ । बैठकले भोटेकोशी बाढीबाट रसुवा, नुवाकोट र धादिङमा ठूलो जनधनको क्षति भएको तथा चितवन, गोरखा, तनहुँ र नवलपरासीसमेत प्रभावित भएको भन्दै बेपत्ता नागरिकको खोजी तथा उद्धार कार्यलाई तीव्र बनाउन सरकारसँग आग्रह गरेको छ ।
कांग्रेसले प्रदेश सरकार मातहतका अस्पतालमा उपचाररत घाइतेको निःशुल्क उपचार गर्न, बिरामी तथा कुरुवाको व्यवस्थापन र खानाको व्यवस्था गर्न तथा दीर्घरोगीलाई उपलब्ध गराइँदै आएको निःशुल्क औषधिको अभाव हुन नदिन सरकारको ध्यानाकर्षण गराएको छ ।
बाढी प्रभावित क्षेत्रमा उद्धार, राहत र पुनर्स्थापनाका लागि कांग्रेसले आफ्नो पार्टी संरचना परिचालन गर्ने निर्णय गरेको छ । प्रदेशदेखि वडा र टोल तहसम्मका पार्टी संरचनालाई सक्रिय बनाउँदै सरकारी निकायसँग समन्वय गर्न प्रदेश प्रवक्ता तिलकप्रसाद रुवालीको संयोजकत्वमा समन्वय समिति गठन गरिएको छ ।
समितिले रसुवा, नुवाकोट, धादिङ र चितवनका प्रदेश कार्यसमिति तथा सम्बन्धित जिल्ला सभापतिसँग समन्वय गरी आवश्यक उद्धार, राहत तथा पुनर्स्थापनाका काम अघि बढाउनेछ।
बाढीका कारण अवरुद्ध आवागमन सहज बनाउन वैकल्पिक सडक, झोलुङ्गे पुल तथा बेलीब्रिज निर्माण तत्काल अघि बढाउन कांग्रेसले प्रदेश सरकारसँग आग्रह गरेको छ । त्यस्तै, घरबारविहीन भएका परिवारका लागि अस्थायी तथा स्थायी पुनर्वासको व्यवस्था गर्नसमेत माग गरिएको छ ।
कांग्रेसले आर्थिक वर्ष २०८३र८४ को बजेटमा समावेश १ हजार घर निर्माण तथा आयआर्जनका लागि सीप, प्रविधि र बीउ पुँजी हस्तान्तरण कार्यक्रमलाई बाढीपीडितको पुनर्स्थापनामा केन्द्रित गर्न प्रदेश सरकारसँग आग्रह गरेको छ।
बैठकले भोटेकोशी बाढीमा परी ज्यान गुमाएका स्वदेशी तथा विदेशी नागरिकप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ।
यसैगरी, कांग्रेस बागमती प्रदेश प्रशिक्षण विभागका सदस्यसचिव रामेश्वर ढकालकी धर्मपत्नी शुभद्रा ढकालको गोसाइँकुण्ड क्षेत्रमा भएको असामयिक निधनप्रति पनि बैठकले दुःख व्यक्त गरेको छ। बैठकले दिवंगत आत्माको चिरशान्तिको कामना गर्दै शोकसन्तप्त परिवारजनप्रति समवेदना प्रकट गरेको छ।
