रामेछाप । तराईका जिल्लाबाट राजश्व छली गरि अवैद्य तरिकाले लुकाईछिपाई रामेछाप भित्राइएको चुरोट सहित दुई युवालाई प्रहरीले पक्राउ गरेको छ ।
राजश्व छली गरि चुरोट रामेछाप भित्रयाउँदै गरेको भन्ने सूचनाको आधारमा प्रहरीले मन्थली नगरपालिका–६ सेलेघाट प्रहरी चौकीमा चेकजाँच गर्दा बा.प्र.०३००५ प ३७६६ र मधेश प.०२–०१३ प २५३१ नम्वरको मोटरसाइकलमा ल्याइएको एच १० नामक चुरोट १ सय ४४ पेटी र खुल्ला ३४ पेटी प्रहरीले बरामद गरेको हो ।
चुरोट सँगै प्रहरीले मोटरसाइकल सहित मकवानपुर जिल्ला हेटौडा उप–महानगरपालिका–१५ वस्ने वर्ष ३२ का राजकुमार लोप्चन र सोही गाउँका वर्ष २६ का कृष्णकुमार बर्णवाललाई पक्राउ गरि आवश्यक कारवाहीको लागि बरमाद सामान, मोटरसाइकल र चालक सहित राजश्व अनुसन्धान विभाग ललितपुर पठाइएको जिल्ला प्रहरी कार्यालय रामेछापले जनाएको छ ।
सडक निमार्ण भएसँगै विभिन्न भाडा तथा निजी सवारीसाधनहरु तराईबाट सिधै रामेछापसम्म आउन थालेपछि छिमेकी मुलुक भारतवाट राजश्व छली गरि नेपाल भित्राइएका सामाग्रीहरु सिधै रामेछापसम्म आउन थालेका छन् । तराइका जिल्लाहुँदै ल्याइएका सामानहरु रामेछापको उत्तरी क्षेत्र गुम्देलसम्म पुग्ने गरेको छ । प्रहरीले चेकजाँचमा कडाई नगर्दा जिल्लामा भित्राइएका सामाग्रीहरु सस्तो पाउने भएपछि उपभोक्ताहरु त्यसतर्फ आर्कषित हुँदै आएका छन् । यता व्यवसाय दर्ता गरेर सरकारलाई राजश्व तिर्दै आएका व्यवसायीहरु भने मारमा पर्दै आएका छन् ।
