रामेछाप । जिल्ला प्रशासन कार्यालय रामेछापले अनसनरत बिनु यादवलाई अनसन तोड्न गरेको अनुरोध अस्वीकार गरेको छ । यादवले आफ्नो श्रीमान् प्रदीप कठायतको घरमा बस्ने व्यवस्था मिलाई दिन माग गर्दै आइतबार दिउँसो देखि अनसन बस्दै आएकी छिन् ।
जिल्ला प्रशासन कार्यालय रामेछापको मूल गेटको खुल्ला आकाश मुनी सडकमा आमरण अनसन सुरु गरेकी बिनु यादवले प्रमुख जिल्ला अधिकारी अनिता निरौलाले मङ्गलवार दिनभर गरेको प्रयासलाई अस्वीकार गरेकी छिन् ।
यादव अनसनमा बसेको विषयलाई लिएर सोमबार दिनभर गृह मन्त्रालय,राष्ट्रिय महिला आयोग र राष्ट्रिय मानव अधिकारी आयोगको समेत सम्पर्कमा रहेकी प्रजिअ निरौलाले अनसन तोडाउन जिल्लाका सञ्चार कर्मी र मानव अधिकारकर्मी सहित सर्व पक्ष बैठक समेत बोलाएर समाधानका उपाएका बारेमा पनि धारणा लिने प्रयास गरेकी थिइन् ।
प्रतिअले आइतबार जस्तै सोमबार दिउँसो पनि बिनु र प्रदीप दुवैलाई बोलाएर आफ्नै कार्यकक्षमा राखेर पटक पटक आग्रह गरेकी थिइन् । प्रतिअले गरेको भगीरथ प्रयत्नलाई पनि बिनुले ठाडै इन्कार गरिन् । उनले आफूले प्रदीपको मन्थलीको घरमा बस्ने व्यवस्था नभए सम्म सहमतिमा नआउने अडान लिइन् भने प्रतिपले सर्वोच्च अदालतमा विचाराधीन अवस्थामा अर्को मुद्दा चली रहेकोले उनलाई मुद्दा किनारा नलागे सम्म घरमा लगेर राख्न नसकिने अडान लिए । यद्यपि कठायतले भने उच्च अदालत पाटनले गरेको आदेशको परिधि भित्र रहेर बिनुलाई दिनु पर्ने सुविधा दिन भने आफू तयार रहेको छलफलका क्रममा बताएका थिए ।
आइतबार दिउँसोभर भएको प्रयास पछि पनि बिनुले अनसन तोड्न अस्वीकार गरेपछि प्रतिअले समाधानको थप उपाएको बारेमा जिल्ला सुरक्षा समितिको बैठक पनि बोलाएकी थिइन । राष्ट्रिय महिला आयोगले बिनु र उनका श्रीमान् प्रदीप कठायत समेतलाई राखेर अनसन तोड्नका लागि समन्वय गरी दिन आग्रह गरेको थियो ।
प्रजिअ निरौलाले बिनुको माग र कानुनले प्राप्त अधिकारका आधारका विषयमा जिल्ला सुरक्षा समितिको बैठक पनि वोलाएकी थिइन् । गृह मन्त्रालय ,राष्ट्रिय महिला आयोग र मानव अधिकार आयोग समेतलाई बोधार्थ दिएर तयार पारेको आठ बुँदे निर्णय प्रतिअले हस्तान्तरण गर्नासाथ बिनुले च्यातेर फाली दिएको प्रजिअ अनिता निरौलाले जानकारी दिइन् ।
यादवले भने आफूले उच्च अदालत बाट मुद्दा जितेर श्रीमानको घरमा बस्न आउँदा समेत बस्न नपाएको भन्दै श्रीमानको घरमा बस्न पाउनु पर्ने श्रीमती र बुहारीले पाउनु पर्ने अधिकार आफूले पाउनु पर्ने माग राखेकी छिन् ।
बिनुको सुरक्षाका लागि अनसन स्थलमा ठुलो सङ्ख्यामा प्रहरी परिचालन गरिएको थियो । सो अवसरमा प्रजिअ निरौलाले उनको स्वास्थ्य अवस्थाको बारेमा जानकारी लिँदै प्रजिअ निरौलाले उक्त लिखत पढ्न नसक्ने भए पढेर सुनाउने भन्दै बिनुलाई कानुनको पाबन्दीलाई राम्ररी बुझिदिन पनि आग्रह गरिन् । चिसोमा अनसन बस्दा समस्या आउने भए पनि अहिले भने बिनुको स्वास्थ्य अवस्था भने सामन्त रहेको जानकारी चिकित्सकहरूको टोलीले गराएको रामेछापका प्रहरी प्रमुख डिएसपी होम पराजुलीले जानकारी दिए ।
