वासिङ्टन । अमेरिकी पुनरावेदन अदालतले पूर्वराष्ट्रपति डोनाल्ड ट्रम्पले विभिन्न देशमाथि लगाएका अधिकांश भन्सार दरलाई अवैध ठहर गरेको छ । वासिङ्टन डीसीस्थित संघीय सर्किटका लागि पुनरावेदन अदालतले शुक्रबार सुनाएको आदेशमा ट्रम्पले लगाएका भन्सार करहरू अन्तर्राष्ट्रिय आपतकालीन आर्थिक शक्ति ऐन (IEEPA) को दायराभित्र नपर्ने निष्कर्ष निकालिएको अन्तर्राष्ट्रिय समाचार संस्था रोयटर्सले जनाएको छ।
अदालतले भने अमेरिकी सर्वोच्च अदालतमा पुनरावेदन गर्ने अवसर ट्रम्प प्रशासनलाई दिएको छ। सर्वोच्च अदालतमा पुनरावेदन प्रक्रिया अघि बढुन्जेलका लागि अक्टोबर १४ सम्म ती करहरूलाई यथावत राख्न अनुमति दिइएको छ।
यो फैसलाले ट्रम्पको प्रमुख आर्थिक नीति हतियारका रूपमा रहेको भन्सार दरको प्रयोगमा कानुनी चुनौती खडा भएको छ। उनले चीन, क्यानडा र मेक्सिकोमाथि लगाएका छुट्टै करहरूमाथि पनि अदालतले प्रश्न उठाएको छ।
अदालतको आदेश ७–४ को बहुमतले पारित भएको हो। बहुमतमा रहेका सातमध्ये छ जना न्यायाधीश डेमोक्रेटिक राष्ट्रपतिहरूद्वारा नियुक्त थिए भने विपक्षमा रहेका चारमध्ये दुई–दुई जना डेमोक्रेटिक र रिपब्लिकन राष्ट्रपतिद्वारा नियुक्त थिए।
ट्रम्पले भने अदालतको यो आदेशलाई ‘अत्यधिक पक्षपातपूर्ण’ भन्दै आलोचना गरेका छन्। उनले सर्वोच्च अदालतले यसलाई उल्ट्याउने दाबी गर्दै, “मलाई विश्वास छ सर्वोच्च अदालतको सहयोगमा यी करहरूले अमेरिकालाई फाइदा पुर्याउनेछन्,” भनेका छन्।
