मन्थली -जिल्ला प्रशासन कार्यालय रामेछापले बाढी पहिरोको जोखिमले बाटोमै रोकिएका यात्रुहरुलाई उचित व्यवस्थापन गर्न निर्देशन दिएको छ ।बाढीपहिरोबाट प्रभावित यात्रुहरूको सुरक्षा र सुविधाका लागि आवश्यक सहयोग र समन्वय गरी उचित व्यवस्थापन गर्न कार्यालयले निर्देशन दिएको हो ।
प्रमुख जिल्ला अधिकारी श्याम कृष्ण थापाले स्थानीय तह, यातायात व्यवसायी, गैरसरकारी संघसंस्था र निजी क्षेत्र लगायत सबै सरोकारवाला निकायहरूलाई यात्रुहरूको खानपान, स्वास्थ्योपचार र सुरक्षित बसोबासको व्यवस्था गर्न पत्राचार गर्नु भएको हो । उहाँले राष्ट्रिय विपद् जोखिम न्यूनीकरण तथा व्यवस्थापन प्राधिकरणको निर्णयबारे जानकारी दिँदै गन्तव्य सम्म नपुगेका यात्रुहरूको लागि उचित व्यवस्थापन गर्न सबैको सहयोगको अपेक्षा गर्नु भएको छ।
