रामेछाप । मन्थली नगरपालिकाका प्रमुख प्रशासकिय अधिकृत लिलाराज पौडेल बिरुद्ध अख्तियार दुरुपयोग अनुसन्धान आयोगमा चार र सम्पति सुद्धिकरण अनुसन्धान विभागमा एक गरी पाँच वटा उजुरी दर्ता भएका छन् ।

अधिकृत पौडेलले मन्थली नगरपालिकामा रहेर विभिन्न योजनाको नाममा करोडौ रुपैयाँ भ्रष्टाचार गरेको आरोपमा आयोगमा सी–००२७४३ र अन्य तीनवटा गरी चारवटा उजुरी पौडेल बिरुद्ध अख्तियार दुरुपयोग अनुसन्धान आयोगमा दर्ता भएका छन् । जसमा अख्तियार अनुसन्धान आयोग टंगाल काठमाण्डौंमा तीन, अख्यिार दुरुपयोग अनुसन्धान आयोग बर्दिवासमा एक र सम्पत्ति सुद्धिकरण अनुसन्धान विभागमा एक गरी पाँचवटा उजुरी दर्ता भएको छ ।

मन्थली नगरपालिकाका प्रमुख प्रशासकिय अधिकृत पौडेल बिगत २ वर्षदेखी मन्थली नगरपालिकामा कार्यरत छन् । उनले नगरपालिकाको प्रमुख प्रशासकिय अधिकृत पदमा बसेदेखी हालसम्म पालिका भित्र निमार्णाधिन सडक, भवन, मन्दीर लगाएतका विकास निमार्णमा उपभोक्ता समिति र निमार्ण व्यवसायी मार्फत लाखौं रुपैयाँ कमिशन लिने गरेको आरोप उजुरी कर्ताको रहेको छ ।

त्यसैगरी अधिकृत पौडेलले कार्यालयको गाडी मर्मत र इन्धनमा नक्कली फर्जी बिल बनाई लाखौं रकम भ्रष्टाचार गर्ने गरेको साथै कार्यालयमा आवश्यक नै नभएको फर्निचर र स्टेशनरी सामाग्री बजार मूल्य भन्दा बढी मूल्यमा खरिद गरेको बिल राखी भुक्तानी गरेर व्यवसायीसँग रकम असुल्ने गरेको आरोप पनि उनीमाथि रहेको छ ।

त्यस्तै अधिकृत पौडेलले नगरसभावाट पारित नै नगराई योजनाहरु उपभोक्ता समिति र निमार्ण व्यवसायीलाई दिएर लाखौं रकम कमिशन लिने गरेको, अतिथि सत्कारको नाममा लाखौं रकम नियम विपरित कार्यालयवाट लिई भ्रष्टाचार गरेको आरोप छ । यसैगरी आ.व.०७७÷०७८ मा वडा स्तरमा दिने योजनाहरु वडाले उपभोक्ता समिति गठन नै नगरी वडाको सिफारिस बिना आफ्नो खुशिले रकम वितरण गर्दै किर्ते कागजात निमार्ण गरी करोडौं रुपैयाँ भ्रष्टाचार गरेको आरोप पनि उनी माथि लागेको छ ।

त्यस्तै मन्थली अस्पतालमा आवश्यक उपकरण र औषधी खरिद गर्दा राष्ट्रिय दैनिक पत्रिकामा सूचना नै ननिकाली कोटेशनमा खरिद गरी लाखौं रुपैयाँ भ्रष्टाचार गरेको, आ.व.०७८÷७९ मा पालिका भित्र रहेका विभिन्न फाँटहरुको रकम रकमान्तर गरी भ्रष्टाचार गरेको भन्दै उजुरीकर्ताले अख्तियारमा उजुरी दर्ता गराएका हुन ।

यस्तै प्रशासकिय अधिकृत पौडेलले मन्थली माध्यमिक विद्यालयसँग साठगाठ गरी कक्षा १० सम्म अध्ययनरत विद्यार्थीबाट मासिक शुल्क असुल्ने गरेको, विद्यालयको भवन निमार्ण गर्दा टेण्डर प्रक्रिया नै नगरी उपभोक्ता समिति मार्फत काम गराएर लाखौं रुपैयाँ असुल्ने गरेको, आफ्नै कर्मचारीलाई वर्षैपिच्छे कृषि अनुदान रकम दिएर अनियमितता गरी राज्यको ढुकुटीलाई दुरुपयोग गर्दै गैरकानुनी रुपमा अकुत सम्पति कमाएको उजुरीकर्ताको दावी छ ।

अधिकृत पौडेलले आर्थिक अनियमितता गरेको भन्दै परेको उजुरीको बिषयमा अख्तियार दुरुपयोग अनुसन्धान आयोगबाट जिल्ला प्रशासन कार्यालय रामेछापलाई पत्राचार गरेको जिल्ला प्रशासन कार्यालय रामेछापका प्रमुख जिल्ला अधिकारी दीपककुमार पहाडीले जानकारी दिए । उनले भने– अख्तियारवाट पत्र प्राप्त भएको छ । अहिले हामी अनुसन्धानकै क्रममा रहेकाले सबैकुरा भन्न मिल्दैन, अनुसन्धान पछि मात्रै जानकारी गराउने छौं ।

यता मन्थली नगरपालिकाका प्रमुख प्रशासकिय अधिकृत पौडेलले भने आफुले कमिशन लिएको र अनियमितता गरेको बारे अख्तियारले सोधेमा जवाफ दिने बताए ।