रामेछाप । यहीँ मंसिर ४ गते हुने प्रतिनिधिसभा र प्रदेश सभाका उम्मेदवाारलाई जिताउन मतदाताको टोलटोलमा नेपाली काँग्रेसले “जनताको साथमा काँग्रेस” अभियान लिएर गाउँ पसेको छ ।
सोही अभियान अन्तर्गत नेपाली काँग्रेसले उमाकुण्ड गाउँपालिकामा कार्यक्रम सम्पन्न गरेको छ । कार्यक्रममा नेपाली काँग्रेसका सचिव दिपक खड्काले मंसिर ४ गते हुने प्रतिनिधि सभा र प्रदेश सभाको निर्वाचनमा काँग्रेसवाट उम्मेदवार बनेका नेतालाई निर्वाचित गराउन सबै नेता तथा कार्यकर्ताहरु एकढिक्का भएर लाग्नुपर्ने बताएका छन् ।
उनले भने– नेकपा एमालेले गरेको ज्यादती र संविधानको रक्षाको लागि पनि नेपाली काँग्रेसले जित्नु पर्छ । हिजो पार्टी भित्र आन्तरिक रुपमा भएका तितामिठा कुराहरु बिर्सेर आउँदो निर्वाचनमा पार्टीको उम्मेदवारलाई जिताउन एक भएर सबै कार्यकर्ताहरु लाग्नुु पर्छ । स्थानिय तहको निर्वाचनमा कसले टिकट पायो, कसले सहयोग गर्यो वा गरेन भन्ने सबै कुरा छाडेर पार्टीले टिकट दिएको नेतालाई जिताउन सबै लागि पर्नुपर्ने बताए ।
नेपाली काँग्रेस उमाकुण्ड गाउँपालिका उप–सभापति बाबुराम कटुवालको अध्यक्षता तथा नेपाली काँग्रेस रामेछापका सचिव दीपक खड्काको प्रमुख आतिथ्यतामा सम्पन्न भएको उक्त अभियान कार्यक्रममा उमाकुण्ड गाउँपालिकाकी उपाध्यक्ष सावित्री सुनुवार, नेपाली काँग्रेस महाधिवेशन प्रतिनिधि झपडराज भण्डारी, स्थानिय तह निर्वाचनमा अध्यक्ष पदका उम्मेदवार जीतवहादुर कटुवाल लगाएतले आ–आफ्नो मन्तव्य राख्दै मंसिर ४ गते हुने निर्वाचनमा जसरी भएपनि काँग्रेसका उम्मेदवारलाई निर्वाचित गराउन सबै कार्यकर्ताहरु एकजुट भएर लाग्न आग्रह गरे ।
नेपाली काँग्रेसले मंसिर ४ गते हुने निर्वाचनलाई लक्षित गरी रामेछापको २ नगरपालिका र ६वटा गाउँपालिका गरि ८ वटै स्थानिय तहमा “जनताको साथमा काँग्रेस” कार्यक्रम लिएर नेताहरु गाउँ पसेका हुन् ।
