रामेछाप । बागमती प्रदेश सभा सदस्य आनन्द श्रेष्ठले आवश्यकताको पहिचान नगरी विकास गर्न नहुने बताएका छन् । नेपाल युनेस्को संघ–संस्था तथा क्लबहरूको राष्ट्रिय महासंघले लिखुतामाकोशी गाउँपालिका–६ खिम्तिमा आयोजना गरेको नेतृत्व तथा क्षमता विकास सम्बन्धी तालिमको उद्घाटन कार्यक्रमलाई सम्बोधन गर्दै आवश्यकताको पहिचान गरेर मात्र विकास गर्नु पर्ने बताएका हुन् ।
सांसद श्रेष्ठले कुन स्थानमा के आवश्यक छ पहिचान नगरी जता त्यतै विकास गर्दै जाने हो समृद्ध नेपाल बन्न नसक्ने बताएका हुन् । नागरिकले पनि आवश्यकताको पहिचान गरेर योजना माग गर्ने र दिने निकायले पनि अध्ययन विना कुखुरालाई चारो छरेको जसरी विकासका योजना वितरण गर्दा देश सङ्कटमा पर्दै गएको बताए । जिल्ला स्तरमा गरिने विकास निर्माण पहुँच र पावरको भरमा गरिएकै कारण शिक्षा, स्वास्थ्य र खानेपानीको आयोजनाहरू केही वर्षमा खण्डहरको रूपमा परिणत हुने सांसद श्रेष्ठको दाबी छ । अहिले भइरहेका विकास निर्माणका काम बारे प्रश्न गर्दै १० वर्ष पछि ती सबै संरचनाहरू’खण्डहर’ बन्ने दाबी गरे ।
नेपाल युनेस्को संघ–संस्था तथा क्लबहरूको राष्ट्रिय महासंघ रामेछापका अध्यक्ष कल्पना खड्काको अध्यक्षतामा भएको कार्यक्रममा सांसद श्रेष्ठ सहित भानु नगरपालिका तनहुँका नगरप्रमुख एवं नेपाल युनेस्को संघ–संस्था तथा क्लबहरूको राष्ट्रिय महासंघका केन्द्रीय अध्यक्ष आनन्द राज त्रिपाठी सहित, जिल्लाका विभिन्न संघ संस्थाका प्रमुख एवं प्रतिनिधिहरूको सहभागिता रहेको थियो । खड्काले नेपाल युनेस्को संघ–संस्था तथा क्लबहरूको राष्ट्रिय महासंघले शिक्षा, विज्ञान, संस्कृति आमसञ्चार र सामाजिक क्षेत्रमा काम गर्दै आएको जानकारी दिए ।
