रामेछाप । रामेछाप जिल्लामा अघिल्लो वर्षको तुलनामा यस वर्ष आत्महत्या गर्नेको सङ्ख्या बढेको छ । जिल्ला प्रहरी कार्यालय रामेछापले शुक्रवार पत्रकार सम्मेलन गरी आर्थिक वर्ष २०७८÷०७९को तुलनामा आत्महत्या गर्नेको सङ्ख्या यस वर्ष बढेको जानकारी दिएको छ ।
आर्थिक वर्ष २०७८÷०७९ मा २९ जनाले झुन्डिएर र १४ जनाले विष सेवन गरी जम्मा ४३ जनाले आत्महत्या गरेको घटना प्रहरी कार्यालयमा दर्ता भएको थियो । आर्थिक वर्ष २०७९÷०८० एक वर्षको अवधिमा ४३ जनाले झुन्डिएर र ८ जनाले विष सेवन गरी ५१ वटा आत्महत्याका घटना दर्ता भएको जिल्ला प्रहरी कार्यालय रामेछापका प्रमुख प्रहरी नायव उपरीक्षक होमबहादुर पराजुलीले जानकारी दिए ।
शुक्रवार जिल्ला प्रहरी कार्यालयमा पत्रकार भेटघाट कार्यक्रममा प्रहरी नायव उपरीक्षक होमबहादुर पराजुलीले एक वर्षमा प्रहरीले सञ्चालन गरेको गतिविधि, जिल्लाको शान्ति सुरक्षाको अवस्था साथै जिल्लाको बस्तुस्थितको बारेमा जानकारी गराएका थिए ।
जिल्लामा आत्महत्याको घटना बढ्नु चिन्ताको विषय भएको डिएसपी पराजुलीले बताए । आत्महत्या न्यूनीकरणका लागि प्रहरीले विभिन्न चेतनामूलक कार्यक्रम सञ्चालन गरिरहे पनि न्यूनीकरण हुन नसकेको भन्दै यसका लागि सरकार साथै सरोकारवालाहरूको सहयोग आवश्यक रहेको बताए ।
