रामेछाप । रामेछापका पेट्रोलियम व्यवसायीहरूले आफ्नो माग पुरा नभए सोमबार देखी आन्दोलनमा उत्रने चेतावनी सहित आइतबार प्रेस विज्ञप्ति जारी गरेको छ । जिल्लामा सञ्चालित ४ वटै पम्पहरूले आफूहरूको जायज माग पुरा नगरे देखी सोमबार  देखी चरणबद्ध आन्दोलन गर्ने घोषणा सहित विज्ञप्ति जारी गरेको हो । 

यही भाद्र १६ गते उद्योग वाणिज्य कार्यालय रामेछापले अस्वाभाविक रूपमा बजारमा पेट्रोलियम पदार्थ अभाव गराएको भन्दै रामेछापका दुई वटा पेट्रोल पम्पहरू जरिवाना सहित सिल गरेको थियो । उद्योग वाणिज्य कार्यालय रामेछापले बसपार्कको निलकण्ठेश्वर आलय स्टोर्सलाई इन्धनको न्यूनतम मौज्दात नराखेको, पेट्रोल र डिजेलको डिस्पेन्सर बन्द गरेको, र भैशेश्वरमा सञ्चालित शुभ समृद्धि आलय स्टोर्स बन्द अवस्थामा भेटिएको भन्दै निलकण्ठेश्वर आलय स्टोर्सलाई २ लाख ५० हजार जरिवाना सहित सिल र शुभ समृद्धि आलय स्टोर्सलाई बन्द रहेको अवस्थामा सिल गरेको थियो । उक्त सिल बन्दीको विरोध गर्दै आफ्नो माग पुरा नभए सिन्धुली हाइवे पेट्रोलियम डिलर्स एसोसिएसनले भाद्र २४ गते सोमबार जिल्लाका सबै पेट्रोलियम व्यवसायीहरू सँग छलफल गर्ने, २५ गते मङ्गलवार बाट ४ वटै पम्पहरूले तेल बिक्री वितरण नगर्ने, २६ गते बुधवार बाट अनिश्चित कालीन ४ वटै पेट्रोल पम्पहरूले पम्प बन्द गर्ने घोषणा गरेको छ । 

पत्रकार सम्मेलनमा सार्वजनिक गरिएको डिलर्स एशोसियशनको ध्यानाकर्षण पत्रमा भनिएको छ ‘मन्थली १ स्थित लक्ष्मी आयल स्टोर्स मन्थली र जाल्पादेवी आयल स्टोर खिप्तीले समेत सो अवधिमा तेल बिकी गरिरहेकोले मन्थलीमा तेलको अभाव नरहेको अवस्था हुँदा हुँदै जरिवाना गर्नु कतिको सान्दर्भिक हुन्छ ’ निलकण्ठेश्वर आयल स्टोर माथि गरिएको जरिवाना यथाशीघ्र खारेज होस् भन्दै थप भनिएको छ ‘शुभ संवृद्धि आयल स्टोर्स भैसेश्वरले भदौ १० गते आफ्ना पिताजी गम्भीर बिरामी भई काठमाडौँ लैजानुपर्ने अवस्था सिर्जना भई जिल्ला प्रशासन कार्यालय रामेछापमा लिखित निवेदन दिएको सो विषयको समेत प्रवाह नगरी प्रो. काठमाण्डौमा भएकै अवस्थामा तेल डिपोमा गई सिल बन्दी गरेकोले कम्तीमा बिरामीको गम्भीर अवस्था अनुसार ८÷१० दिन लाग्नेमा सोही समय भित्र सिल बन्दी गरेकोमा यधाशिध्र सिल खोली नियमित तेल विक्री वितरण गर्ने व्यवस्था होस भनिएको छ । 

एसोसिएसनका अध्यक्ष रामहरि थापा सहितको उपस्थितिमा जिल्लाका चारै पेट्रोल पम्पहरूले जिल्ला प्रशासन, उद्योग वाणिज्य कार्यालय र रामेछाप उद्योग वाणिज्य सङ्घमा ध्यानाकर्षण पत्र सहितको अन्तरक्रिया गरी आफूहरूका माग र गुनासाहरू सुनाउने उद्योग वाणिज्य सङ्घ रामेछापमा निवर्तमान अध्यक्ष केशव घिमिरेले बताए । घिमिरेले आयल स्टोरहरूलाई एक्कासि ‘नियतवश गरिएको कारबाही फुकुवा गर्नु पर्ने समेत पत्रकार सम्मेलनमा बताएका छन् । शुभ समृद्धि आयल स्टोर्सका सञ्चालक जीवन बुढाथोकीले पारिवारिक समस्या र पेट्रोलियम पदार्थको आयातमा हुने प्राविधिक समस्या बाहेक तेल बिक्री वितरणमा अवरोध नगरेको  भन्दै अस्वाभाविक तेलको बिक्री वितरणमा रोक लगाएको उद्योग वाणिज्यको आरोप स्वीकार्य नहुने दाबी गरेका छन् ।