काठमाडौं । पार्टीभित्रको विवादलाई लिएर आन्दोलनको चेतावनी दिइएको अवस्थामा पनि निर्वाचन आयोग आफ्नो संवैधानिक दायित्वबाट विचलित नहुनेमा कांग्रेस उपसभापति विश्वप्रकाश शर्माले भरोसा व्यक्त गरेका छन् ।
विशेष महाधिवेशनबाट निर्वाचित उपसभापति शर्माले निर्वाचन आयोगका पदाधिकारीसँगको भेटका क्रममा केहीबेरअघि कांग्रेस केन्द्रीय कार्यालयमा आयोजित पत्रकार सम्मेलनको सन्दर्भ उल्लेख गर्दै आयोगको स्वतन्त्रता, निष्पक्षता र संवैधानिक निष्ठाप्रति विश्वास व्यक्त गरे ।
उनका अनुसार आयोगले कुनै पनि प्रकारको दबाब, धम्की वा राजनीतिक चेतावनीबाट प्रभावित नभई संविधान र कानुनअनुसार निर्णय लिनेछ । पार्टीभित्र उत्पन्न विवाद समाधानमा आयोगले आफ्नो भूमिकालाई जिम्मेवार ढंगले निर्वाह गर्नेमा आफूहरू ढुक्क रहेको शर्माको भनाइ थियो ।
यसअघि शेरबहादुर देउवा नेतृत्व पक्षका तर्फबाट कार्यवाहक सभापति पूर्णबहादुर खड्काले पत्रकार सम्मेलनमार्फत आफूहरूले नेतृत्व गरिरहेको कांग्रेसलाई मान्यता नदिइए देशभर आन्दोलन गर्ने चेतावनी दिएका थिए । उक्त चेतावनीबारे जानकारी पाएपछि आयोगसमक्ष आफ्नो धारणा स्पष्ट पार्न आफूहरू आयोग पुगेको उपसभापति शर्माले बताए ।
‘आयोगले हाम्रो पक्षमा निर्णय गरेन भने आन्दोलन गर्ने चेतावनी दिइएको कुरा हामीले सुनेका छौं,’ शर्माले भने, ‘तर निर्वाचन आयोग यस्ता चेतावनी र दबाबबाट प्रभावित हुँदैन भन्नेमा हामी विश्वस्त छौं ।’
उनले पार्टीभित्रका विवाद समाधान संवैधानिक प्रक्रिया र पार्टी विधानको दायराभित्रै हुनुपर्नेमा जोड दिँदै आयोगको भूमिकाप्रति सम्मान व्यक्त गरेका छन् ।
