काठमाडौँ ः प्रधानमन्त्री पुष्पकमल दाहाल ‘प्रचण्ड’ आज साँझ अमेरिका प्रस्थान गदै छन् । संयुक्त राष्ट्रसङ्घीय महासभामा सहभागी हुन प्रधानमन्त्री प्रचण्ड आज अमेरिका प्रस्थान गर्न लागेका हुन् ।
नेपाली प्रतिनिधि मण्डलको नेतृत्व गर्दै प्रधानमन्त्री प्रचण्ड साँझ ६ बजे कतार एयरवेजको जहाजमार्फत न्यु योर्क प्रस्थान गर्न लागेका हुन् । उनले असाजे ४ गते संयुक्त राष्ट्र सङ्घको महासभालाई सम्बोधन गर्ने कार्यक्रम रहेको परराष्ट्र मन्त्रालयले जनाएको छ ।
त्यसअघि नेपालले राष्ट्र सङ्घमा आबद्ध अल्पविकसित देशको समूह एलडीसीको अध्यक्षता गर्नेछ । अध्यक्ष देशका तर्फबाट प्रचण्डले सम्बोधन गर्नेछन् । यो फोरममा दिगो विकासका लक्ष्य एमडीजीमा चर्चा गर्ने कार्यक्रम छ ।
यस्तै प्रचण्ड अमेरिकी राष्ट्रपति जो बाइडेनद्वारा आयोजित स्वागत समारोहमा पनि सहभागी हुने कार्यक्रम रहेको परराष्ट्रले जनाएको छ । प्रधानमन्त्रीको साथमा छोरी गंगा दाहाल, परराष्ट्र मन्त्री एनपी साउद, परराष्ट्र सचिव भरतराज पौड्याल र संयुक्त राष्ट्रसङ्घका लागि स्थायी प्रतिनिधि लोकबहादुर थापालगायत सहभागी हुनेछन् ।
परराष्ट्र मन्त्री साउद नेतृत्वको टोली भने न्यु योर्क पुगिसकेको छ । राष्ट्रसङ्घीय महासभालाई सम्बोधन गरेपछि प्रधानमन्त्री प्रचण्ड न्युयोर्कबाटै असोज ५ गते चीन जाने कार्यक्रम छ ।
