रामेछाप । रामेछापको पर्यटकीयस्थल शैलुङमा आज देखी अन्तराष्ट्रिय शैलुङ म्याराथन (दौड) प्रतियोगिता हुदैछ । प्रतियोगितामा २ सय ५० जना प्रतियोगि सहभागि हुने भएको छ । ऐतिहासिक पर्यटकीय स्थल शैलुङमा पहिलो पटक ५५, २५ र ५ किलोमिटर लामो म्याराथन प्रतियोगिता हुन लागेको हो ।
राष्ट्रिय खेलकुद परिषद आयोजनाका अनुसार प्रतियोगिता अन्तर्गत ५५ किलोमिटर लामो म्याराथन प्रतियोगिता सुनापति गाउँपालिकाको हिलेदेवी बाट शुरु हुने छ । हिलेदेवी बाट गाल्वा हुदै खाँडादेवी, दोरम्बा, निगलाबास, डडुवा धारा, घलेडाँडा हुँदै शैलुङ पुगेर टँुगिनेछ । म्याराथनका लागि स्वदेशी र विदेशी गरी ५० जना धावकले नाम दर्ता गराएको जिल्ला खेलकुद विकास समिति रामेछापका कार्यालय प्रमुख अर्जुन कार्कीले जानकारी दिए ।
यसैगरी, सुनापतिबाट सिधै शैलुङ पुग्ने २५ किलोमिटर म्याराथनमा १ सय १ जना र शैलुङडाँडामा मात्रै सीमित ५ किलोमिटर म्याराथनमा ६९ जना धावकले नाम दर्ता गराएको कार्कीले जानकारी दिए ।
प्रतियोगितामा बेलायत, अमेरिका, स्वीडेन, जर्मनी लगायतका विदेशी तथा नेपाली धावकहरुले प्रतिस्पर्धा गर्दैछन् । अल्ट्रा म्याराथन प्रतियोगितामा भाग लिने धावकहरुले विभिन्न ९ स्थानमा चेक प्वाईन्टमा पुगेर नाम दर्ता गराउनु पर्नेछ ।
प्रतियोगितामा प्रथम हुनेलाई ७५ हजार, द्वितीय हुनेलाई ३५ हजार र तृतीय हुनेलाई १५ हजार रुपैयाँ पुरस्कार प्रदान गरिनेछ । प्रतियोगिताको सम्पूर्ण तयारी पूरा भएको छ । म्याराथन प्रतियोगिताका लागि रुट निर्धारण, चेकप्वाईन्ट तयारी लगायतका काम सकिएको राखेपले जनाएको छ ।
