दोलखाको अपर तामाकोशी हाइड्रोपावर लिमिटेडले माथिल्लो तामाकोशी जलविद्युत केन्द्रको जलाशयको गेट खोल्ने/बन्द गर्ने कार्यका कारण तामाकोशी नदीको तल्लो तटीय क्षेत्रमा पानीको सतह बढ्ने-घट्ने जनाएको छ।
आज बिहान १० बजेदेखि बेलुका ५ बजेसम्म जलाशयको गेट खोल्ने र बन्द गरिने हुँदा लामाबगरदेखि सुनकोशी दोभानसम्म नदीमा पानीको बहावमा परिवर्तन आउने कम्पनिले जनाएको छ । यो समयमा नदीमा माछा मार्ने, नुहाउने, पौडी खेल्ने, लुगा धुने, वस्तुभाउ लैजाने, गिट्टी बालुवा निकाल्ने वा गाडी तार्ने जस्ता कार्यहरू नगर्न कम्पनीले सबैमा अनुरोध गरेको छ। धार्मिक कार्य वा दाहसंस्कार गर्नुपर्दा पनि अत्यन्त सावधानी अपनाउन माथिल्लो तामाकोशी जलविद्युत केन्द्रले आग्रह गरेको छ।
