रामेछाप । गोकुलगंगा गाउँपालिकामा चालु आर्थिक वर्ष २०८०÷०८१ मा उपभोक्ता समिति बाट सञ्चालन हुने ८४.८७ प्रतिशत योजनाहरू सम्झौता भएका छन् । उपभोक्ता समिति मार्फत सञ्चालन हुने २ सय ३८ योजना मध्य २ सय २ वटा योजनाको उपभोक्ता समिति गठन गरी कार्यक्रम सम्झौता भएर काम अघि बढिसकेको गाउँपालिकाले जानकारी दिएको छ । हाल सम्म योजना सम्पन्न भएर २९.२१ प्रतिशत भुक्तानी समेत भई सकेको छ ।
नागरिकको सहजतालाई ध्यान दिँदै गाउँपालिकाले वडा स्तरमा गएर कार्यक्रम सम्झौता गराएका छन् । उपभोक्ता समितिहरूले सहज र झन्झट रहित तरिकाले योजना सम्पन्न गर्न सहज बनाउन गाउँपालिका बाट प्रमुख प्रशासकीय अधिकृतको नेतृत्वमा योजना शाखा, प्रविधि शाखा, लेखा शाखा,लगायतका कर्मचारीहरू वडामा गएर जनप्रतिनिधिको रोवरमा उपभोक्ता समितिका पदाधिकारीहरूलाई योजना सम्बन्धी अभिमुखीकरण साथै घुम्ती शिविर मार्फत योजना सम्झौता गरिएको योजना शाखा प्रमुख रामकुमार कार्कीले जानकारी दिए ।
ठुला पूर्वाधार तर्फका आठ वटा योजना मध्य पाँच वटा योजना ठेक्का लागेर सम्झौता भैसकेको छ । पाँच वटा मध्य दुई वटा ठुला योजनाको काम समेत सम्पन्न भई सकेको योजना शाखा प्रमुख कार्कीले जानकारी दिए । बाँकी तिन वटा योजना मध्य दुई वटा योजनाको ठेक्का खुलेको छ भने एक वटा योजनाको ठेक्का खुल्ने प्रक्रियामा रहेको छ ।
