रामेछाप । गोकुलगंगा गाउँपालिकाले आयोजना गरेको राष्ट्रपति रनिङ शिल्ड प्रतियोगीता सम्पन्न भएको छ । राष्ट्रपति रनिङ शिल्डको उपाधि भने वडा नम्बर २ मा रहेको शारदा मावि ठोसे हात पारेको छ । शनिवार शारदा मावि ठोसेको खेल मैदानमा भएको खेलमा पालिका भित्रका ७ वटा माविको सहभागिता रहेको थियो शारदा मा.वि ठोसेले प्रतियोगितामा ६ वटा माविलाई पछि पार्दै उपाधि उचाल्न सफल भएको हो । शारदा माविले ७ स्वर्ण, ९ रजत र ४ कास्य पदक गरी कूल २० पदक जित्तै शिल्ड उचालेको हो ।
सातै स्वर्ण, ६ रजत र ७ कास्य पदक गरी २० वटै पदक जितेको जन जागृत मावि वडा नं ४ बेताली दोस्रो बन्दा ६ स्वर्ण, ४ रजत र ३ कास्य पदक गरी १३ पदक सहित गोकुलगंगा मावि वडा नं ३ रस्नालु तेस्रो बनेको छ ।
जट्टेश्वरी मावि वडा नं १ चुचुरे ४ स्वर्ण, २ रजत र १० कास्य सहित चौथो बन्यो । भने, कमलादेवी माविले ११ पदक, माध्यमिक विद्यालय फर्पु वडा नं ६ ले कूल ५ र सेवी देवी मावि वडा नं १ चुचुरेले कुल ३ पदक जितेको आयोजकले जनाएको छ । विजेता खेलाडीहरूलाई प्रतिनिधि सभा सदस्य पूर्णबहादुर तामाङ (कान्छाराम) ले पुरस्कार सहित शिल्ड, ट्रफि, मेडल र प्रमाण पत्र प्रदान गरेका छन् ।
पालिकाको कूल साँढे ६ लाख रुपैयाँ लागतमा संचालित राष्ट्रपति रनिङ शिल्डमा खेलमा सहभागी प्रत्येक विद्यालयलाई छुट्टै नगद प्रदान गरिएको पालिकाका शिक्षा अधिकृत नरेन्द्र सिंह भण्डारीले जानकारी दिए । कार्यक्रममा पालिका अध्यक्ष काजी बहादुर खड्का, उपाध्यक्ष उषादेवी कार्की, वडा अध्यक्षहरू सहितको उपस्थिति रहेको थियो ।
