रामेछाप । नेपाली काँग्रेस रामेछापका युवा नेता राजनारायण श्रेष्ठको निधन भएको छ । श्रेष्ठको मंगलबार राती हृदयाघातबाट ५० वर्षकोउमेरमा निधन भएको हो । रामेछाप–काठमाडौँ सम्पर्क समितिका सभापति समेत रहेका काँग्रेस नेता श्रेष्ठको मंगलबार आफैले संचालन गर्दै आएको होटलमा उनलाइ राती करिब ८ः३० बजे हृदयाघात भएको र उपचारको लागि किस्ट मेडिकल कलेज तथा शिक्षण अस्पताल लगिएको भए पनि बचाउन नसकिएको नेपाली काँग्रेस रामेछाप प्रदेश सभा (ख) का सभापति राजेश कुमार श्रेष्ठले जानकारी दिए । श्रेष्ठको अन्तिम दाहसंस्कार १२ गते बिहीबार पशुपतिमा गरिने प्रदेश सभापति श्रेष्ठले बताएका छन् ।

नेपाल विद्यार्थी संघको राजनिति बाट काँग्रेसको राजनीतिमा प्रवेश गरेका श्रेष्ठ दुई पटक नेपाली काँग्रेस जिल्ला कार्य समिति रामेछापको सदस्यमा निर्वाचित भएका थिए । नेपाली काँग्रेस रामेछापको १४औँ जिल्ला अधिवेशनमा महाधिवेशन प्रतिनिधिमा चुनाव लडेका श्रेष्ठ गएको स्थानीय तहको निर्वाचनमा नेपाली काँग्रेसबाटै खाँडादेवी गाउँपालिका वडा नं ५ मा पनि वडाध्यक्षमा चुनाव लडेका थिए । तर उनी निर्वाचित हुन सकेनन् । ०५६÷५७ साल देखि नै होटल व्यवसायमा लागेका श्रेष्ठ हाल फास्ट फुड एसोसिएसन नेपालको पुर्व महासचिव एवं हालका सल्लाहकार समेत रहेका थिए ।