काठमाण्डौं । नेपाल विद्यार्थी संघ संस्थापनइतर समूहले भोली बुधबार भेला बोलाएको छ । बुधबार नेता शेखर कोइराला र महामन्त्री गगन थापा समूह निकट केन्द्रीय सदस्यहरूको भेला बोलाइएको हे । इतर समुहले बुधबार बिहान ११ः३० बजे बत्तिसपुतलीको अनुपम फुडल्याण्डमा भेला हुने गरी भेला बोलाएको नेविसंघ केन्द्रीय सदस्य निशाल घिमिरे ले बताए । ‘भेलामा दुई सय २० जना नेविसंघ केन्द्रीय सदस्यलाई बोलाइएको छ,’ उनले भने, ‘नेविसंघको १२ औं महाधिवेशन सुनिश्चितता लगायत विषयमा छलफल गर्छौं ।’ कांग्रेसले सात सय १० सदस्यीय नेविसंघ तदर्थ समिति गठन गरेर महाधिवेशन गर्न भने पनि त्यसतर्फ कुनै तयारी नभएपछि संस्थापन इतर समूहले भेला बोलाएको छ । नेविसंघले गरेका अवैधानिक निर्णयहरू खारेज गर्न पनि उक्त समूहले माग गर्दै आएको छ । नेविसंघको केन्द्रीय समिति ठूलो बनाए पनि असन्तुष्टि बाँकी नै छ । नेविसंघका विभिन्न जिल्ला, क्याम्पस लगायत समितिमा बिबाद देखिएका छन । जिल्ला अध्यक्ष तोक्दै चिठ्ठी दिने क्रम चल्दै आएको छ । इतर समुहले त्यसको बिरोध गर्दै आएको छ ।