रामेछाप । लैङ्गिक हिंसा विरुद्धको १६ दिने अभियानमा रामेछाप नगरपालिकाले जनचेतना मूलक नाटक प्रदर्शन गरेको छ । लैङ्गिक हिंसा सम्बन्धी नाटक मार्फत जनचेतना मूलक सन्देश प्रवाह नगरपालिकाले दिएको छ । मङ्सिर ९ गते देखी सुरु भएको अभियान अन्तर्गत आज (बिहीबार)नगरपालिकाको कार्यालय अगाडी सडक नाटक प्रदर्शन गरिएको हो ।
नगरपालिकाले आर.बि.पी.डब्ल्यु रामेछाप र समाजसेवा जागृति महिला समूहसँगको सहकार्यमा लैङ्गिक हिंसा विरुद्धको १६ दिने अभियान मनाइरहेको छ । आर.बि.पी.डब्ल्यु रामेछाप र समाजसेवा जागृति महिला समूहका कलाकारहरूले लैङ्गिक हिंसा, महिला हिंसा, घरेलु हिंसा र पछिल्लो समय बढिरहेको प्रविधिसँग सम्बन्धित हिंसाहरूको बारेमा जनचेतनामूलक नाटक प्रस्तुत गरेका थिए ।
कार्यक्रमका प्रमुख अतिथि समेत रहेकी जिल्ला समन्वय समिति रामेछापका प्रमुख चिना खडका कार्कीले पछिल्लो समय महिला मात्रै नभएर पुरुषहरू पनि हिंसामा परिरहेको बताएकी छिन् । महिला पुरुष जो जसले हिंसा सहेर बसिरहेका छन् उनीहरूलाई हिंसा सहेर नबस्न समन्वय प्रमुख कार्कीले बताइन् । समन्वय प्रमुख कार्कीले भनिन्“ पुरुष बाट मात्र महिला लाई हिंसा हुन्छ भन्ने हुन्न ।महिला बाट धेरै पुरुष पनि हिंसामा परेका छन् । त्यस कारण हामी आफै यस विषयमा बढी जिम्मेवारी हुन पर्छ । हिंसा सहन पनि हुन्न । हिंसा गर्न पनि हुन्न । यो अपराध हो हिंसा सहने पनि गर्ने पनि समन्वय प्रमुख खड्काले भनिन् ।
उक्त कार्यक्रममा बोल्दै रामेछाप नगरपालिकाका उपप्रमुख बाल कुमारी कार्कीले लैङ्गिक हिंसा अन्त्य गर्न सबै आ–आफ्नो ठाउँबाट एकजुट भएर लाग्नुपर्ने बताइन् । उपप्रमुख कार्कीले १६ दिने अभियान भरी मात्रै नभई वर्ष भरी नै सबै नागरिक सचेत भएर लाग्न सके मात्रै हिंसा अन्त्य हुने बताइन् ।