काठमाडौं ः ऊर्जा, जलस्रोत तथा सिंचाइ मन्त्रालयले जाजरकोट र रुकुम पश्चिमका भूकम्प पिडितलाई निःशुल्क विद्युत् मिटर उपलब्ध गराउने भएको छ । ऊर्जा, जलस्रोत तथा सिंचाइमन्त्री शक्तिबहादुर बस्नेतले भूकम्प पिडितलाई निःशुल्क विद्युत मिटर वितरण गरिने जानकारी दिएका छन् ।
मन्त्री बस्नेतले वैकल्पिक ऊर्जा प्रवर्द्धन केन्द्र मार्फत विद्युत् सेवा नपुगेका स्थानमा भूकम्प प्रभावितका लागि ‘सोलार सिस्टम’समेत वितरणको तयारी भएको बताएका छन् । ‘केन्द्रका कर्मचारी तथ्याङ्क सङ्कलनमा रहेकाले तथ्याङ्क आउने बित्तिकै सोलार सिस्टम उपलब्ध गराइने मन्त्री बस्नेतले जनाएको छ । भूकम्पबाट नलगाड, भेरी, बारेकोटमा ठुलो मात्रामा क्षति भएको छ ।
गत कात्तिक १६ गते राति जाजरकोटको रामीडाँडा केन्द्रबिन्दु बनाएर ६ दशमलव ४ म्याग्निच्यूडको भूकम्प जाँदा १५४ जनाको मृत्यु भएको थियो भने ३४६ घाइते भएका थिए । भूकम्पबाट २६ हजार ५५७ निजी घर पूर्णरूपमा तथा ३५ हजार ४५५ घरमा आंशिक क्षति भएको जनाइएको छ।