रामेछाप– लिखुतामाकोशी गाउँपालिकाले वडा नम्बर ६ खिम्तिमा आयोजना गरेको निःशुल्क आँखा शिविरमा २ सय जना भन्दा बढीले सेवा लिएका छन् । । लिखुतामाकोशी गाउँपालिकाको आयोजना तथा तिलगंगा आँखा प्रतिष्ठानको प्राविधिक सहयोगमा गाउँपालिकाको वडा नं ६ खिम्तीमा संचालन भएको शिविरमा २ सय ७ जनाले सेवा लिएका हुन् ।
गाउँपालिकाले प्राथमिक स्वास्थ्य केन्द्र खिम्तीमा बुधवार संचालन गरिएको शिविरमा विशेषज्ञ टोलीले आँखा जाँच गर्ने क्रममा १६ जनाको आँखाको शल्यक्रिया गर्नु पर्ने देखिएको गाउँपालिकाका अध्यक्ष केशव महतले जानकारी दिएका छन् । अन्य १ सय ९१ जनालाई आँखामा देखिएको विभिन्न समस्या समाधानको लागि चिकित्सकले परामर्श दिनुको साथै आवश्यक औषधि समेत उपलब्ध गराइएको अध्यक्ष महतले जानकारी दिए ।
गाउँपालिकाका आम नागरिकको आँखा बचाउ अभियानमा गाउँपालिका लागेको बताउँदै अध्यक्ष महतले भने– आँखा जस्तो संवेदनशील अङ्गलाई हामीले स्वस्थ राख्न पर्छ । आँखामा समस्या हुदा हाम्रो जीवन चलाउन पनि समस्या हुन्छ । त्यस कारण पनि विभिन्न स्वास्थ्य संस्थाहरूको प्राविधिक सहयोगमा गाउँपालिकाले अघिल्लो वर्ष देखि नै निःशुल्क आँखा शिविर संचालन गरेको बताएका छन् । शिविरमा आएका बिरामी मध्ये शल्यक्रिया गर्नु पर्ने बिरामीको शल्यक्रिया कसरी गर्ने भन्ने विषयमा छलफल भइरहेको अध्यक्ष महतले बताए ।
