रामेछाप । मन्थली नगरपालिका वडा नम्बर ९ पुरानोगाउँमा रहेको कालीदेवी प्रावि भैँसी गोठको रूपमा प्रयोग हुँदै आएको छ । विद्यार्थी नभएपछि स्थानापति माविमा विद्यालय मर्ज भए सँगै जनमैत्री साना कृषि सहकारी संस्थाले उक्त विद्यालय भवनलाई भैँसी गोठको रूपमा प्रयोग गर्दै आएको छ ।
विगत एक वर्ष देखी उक्त विद्यालय भवनमा भैँसीको घाँस तथा भूषा र दाना राख्ने थलो बनेको छ । एक स्थानीयले नाम उल्लेख नगर्ने सर्तमा भने लगभग एक वर्ष देखी जनमैत्री साना कृषि सहकारी संस्थाले सञ्चालन गरेको भैँसी पालन फारमले स्कुल भित्र भूषा र दाना राख्दै आएका छन् । वडा कार्यालयले भाडामा दिएको हो कि के हो थाहा छैन । हामीले विरोध गर्न सक्ने अवस्था छैन । यहाँ मनलाग्दी छ जसले जे पनि गर्छ । दुःखले बनाएको विद्यालय भवनको अवस्था हेर्दा वैराग लागेर आउँछ ।
जनमैत्री साना कृषि सहकारी संस्थाका अध्यक्ष प्रमोद कुमार श्रेष्ठले भने सहकारीहरूले सञ्चालनमा ल्याएको भैँसी फारम नभएको बताए । अध्यक्ष श्रेष्ठले भने सहकारीले भैँसी फारम सञ्चालनमा ल्याएको हैन । भैँसी फारम व्यक्तिगत हो । भैँसी फारमले भूषा र दाना वर्षाको समयमा राखेको हो । अब सकिन लाग्यो । अब केही समयमा खाली हुन्छ । बेवारिसे अवस्थामा अलपत्र छाडेको भवनमा राखेको हो अहिले विद्यालयमा विद्यार्थी छैन । त्यस कारण हामीले प्रयोग गरेको हो श्रेष्ठले भने ।
वडा अध्यक्ष गोकर्ण राज आरणले भने आफूलाई त्यस विषयमा कुनै जानकारी नभएको बताए । विद्यालय विगत ३ वर्ष अघि मर्ज भएपछि खाली छ । हामीले कसैलाई भाडामा लगाएको पनि छैनौँ र दिएको पनि छैन । यस विषयमा हामीलाई कुनै जानकारी छैन वडा अध्यक्ष आरणले भने ।
वडा भित्र भएका सार्वजनिक सम्पत्ति वडा कार्यालयले निगरानी गरी संरक्षण गर्नु पर्ने भएपनी वडा अध्यक्ष आरणले भने गैर जिम्मेवारी जवाफ दिँदै भाग्न खोजेको देखिन्छ । वडा अध्यक्ष स्वयम वडा शिक्षा समितिको संयोजक रहेपनी वडा अध्यक्ष आरणलाई आफ्नो क्षेत्र अधिकारको जानकारी नभएको हो या जिम्मेवारी निर्वाह गर्न नसकेको उनको जवाफ बाट प्रस्ट हुन्छ ।
