रामेछाप । मन्थली नगरपालिकाका कर्मचारी आन्दोलनमा उत्रेका छन् । नगरपालिकाका स्थानीय कर्मचारीले देशका ७ सय ५३ वटै वडामा बिना सहमति स्वचालित सरुवा हुन पाउनु पर्ने, स्थानीय तहको प्रमुख प्रशासकीय अधिकृत पद स्थानीय सेवाको कर्मचारी हुनुपर्ने लगायत विभिन्न २० बुँदे माग राख्दै अनिश्चित कालका लागी पेन डाउन गरेका हुन् ।
बिहीबार पत्रकार सम्मेलन गर्दै कर्मचारीले आत्मसम्मानमा समेत ख्याल नगरी फरक दृष्टिकोणले विभेदपूर्ण कार्य गर्ने नीति सरकारले ल्याउन लागेको भन्दै पेन डाउन गरेर कर्मचारी आन्दोलनमा आएका हुन् ।
स्थानीय तह कर्मचारी सङ्घर्ष समितिले सेवाग्राही प्रति पर्न जाने समस्यामा क्षमा माग्दै हाल अब रुद्ध भएका सेवा भविष्यमा थप समय सेवा गर्ने प्रतिबद्धता जनाउँदै मन्थली नगरपालिका रामेछापमा कार्यरत स्थानीय सेवाका कर्मचारीको संयुक्त प्रेस विज्ञप्तिमा भनिएको छ । स्थानीय तह केन्द्रीय सङ्घर्ष समितिको आयोजनामा काठमाण्डौमा केन्द्रित आन्दोलनलाई थप बल पुर्याई सरकारको गम्भीर ध्यानाकर्षण गर्न सबै स्थानीय तहमा पेन डाउन गर्न केन्द्रीय सङ्घर्ष समितिको आह्वान बमोजिम मन्थली नगरपालिका स्थानीय तह कर्मचारी सङ्घर्ष समितिको बिहीबार बसेको बैठकको निर्णय अनुसार अर्को निर्णय नभए सम्मका लागी अत्यावश्यक सेवा बाहेक अन्य सम्पूर्ण सेवाहरू पेन डाउन गरी बन्द गर्ने निर्णय भएको र सोही अनुसार आफूहरू आन्दोलनमा आएको स्थानीय तह कर्मचारी सङ्घर्ष समिति मन्थली नगरपालिकाका अध्यक्ष उज्ज्वल पोख्रेलले बताए ।
