विराटनगर । कोसी प्रदेशका मुख्य मन्त्री हिकमतकुमार कार्कीले आज प्रदेशसभामा विश्वासको मत लिनु भन्दा अघि राजीनामा दिएका छन् । विपक्षी गठबन्धन र राप्रपाले उनलाई विश्वासको मत नदिने निर्णय गरेसँगै कार्की आज मुख्य मन्त्रीको पद बाट राजीनामा दिएका हुन् ।
मुख्यमन्त्री कार्कीसँग उपसभामुख सहित ४० प्रदेशसभा सदस्यको मात्रै समर्थन रहेको थियो । विपक्षी गठबन्धनमा काँग्रेसका २९, माओवादी केन्द्रका १३, एकीकृत समाजवादीका ४ र जसपाका १ गरी ४७ सदस्य रहेको छ ।
सर्वोच्च अदालतको परमादेशपछि गत भदौ २२ गतेमा हिकमतकुमार कार्की कोसी प्रदेशको मुख्यमन्त्रीमा नियुक्त भएका थिए । उनी संविधानको धारा १६८ को उपधारा ३ बमोजिम ठुलो दलको नेताको हैसियतले मुख्यमन्त्री नियुक्त भएका थिए । मुख्य मन्त्री कार्कीले आज प्रदेशसभामा विश्वासको मत लिनु पर्ने भए पनि आफ्नो पक्षमा विश्वासको मत प्राप्त नहुने भए पछि पद बाट राजीनामा दिएका हुन् ।
