रामेछाप । एम्नेष्टी इन्टरनेशनल नेपाल समूह–१९ रामेछापको अध्यक्षमा अप्रिल अधिकारी पुनः सर्वसम्मत निर्वाचित भएका छन् । सोमबार मन्थलीमा सम्पन्न एम्नेष्टी इन्टरनेशनल नेपाल समूह–१९ रामेछापको दसौँ साधारण सभा तथा पाँचौँ अधिवेशनले अधिकारीलाई पुनः अध्यक्षमा चयन गरेको हो । मानव अधिकारको क्षेत्रमा काम गर्ने अन्तर्राष्ट्रिय संस्था एम्नेष्टी इन्टरनेशनल नेपालको उपाध्यक्षमा कुमार श्रेष्ठ, सचिवमा जानुकी श्रेष्ठ, सहसचिव घना श्रेष्ठ, कोषाध्यक्ष रामहरि केसी, सदस्यहरूमा पुष्कल घिमिरे, विष्णु थापा, युवराज श्रेष्ठ, नीरज श्रेष्ठ (सुमित), गीता कुमारी भुजेल, मिलन विकलाई चयन गरेको छ ।
दसौँ साधारण सभा तथा पाचौं जिल्ला अधिवेशनको उद्घाटन कार्यक्रममा बोल्दै जिल्ला न्यायाधीश इन्दिरा शर्माले द्वन्द्वपीडितहरूको सत्य, न्याय र परिपूरणको सङ्घर्षमा एमनेस्टीका सदस्यहरूलाई अझ बढी सक्रियता बनाउन पर्ने बताउनु भयो । मानव अधिकारको क्षेत्रमा वकालत गर्ने गरी एम्नेष्टी इन्टरनेशनल स्थापना भएको अवगत गराउँदै संयुक्त राष्ट्रसङ्घ, युनेस्को, युरोपियन युनियन लगायतका देशहरूले एम्नेष्टीलाई सल्लाहकारको रूपमा समेत राखेको स्मरण गराउनु भयो ।
अब समूह–१९ रामेछापले सक्रिय रूपमा काम गर्ने र मानव अधिकारको क्षेत्रमा क्रियाशील भएर काम गर्नेमा आफू विश्वस्त रहेको बताउँदै कार्यकालको शुभकामना समेत व्यक्त गर्नु भयो । कार्यक्रममा रामेछाप उद्योग वाणिज्य सङ्घ रामेछापका अध्यक्ष नवीन थापा, पूर्व अध्यक्ष हिमाल ढुङ्गेल, डाक्टर सुमन कर्माचार्य,मन्थली बचत तथा ऋण सहकारी संस्थाका अध्यक्ष गोविन्द घिमिरे लगायतले एम्नेष्टी इन्टरनेशनलको बारेमा जानकारी गराएका थिए ।
