रामेछाप – रामेछाप जिल्लाको दोरम्बा सैलुङ गाउँपालिकामा रहेको पर्यटकीय स्थल सैलुङमा बिहीबार देखी ‘वाइल्ड स्टे विथ चौँरी’ जङ्गली बसाइ कार्यक्रम सुरु भएको छ ।
रामेछाप र दोलखाको सिमानामा पर्ने सैलुङमा पर्यटन प्रवर्धन गर्ने उद्देश्यले ‘स्पार्क एड्भेन्चर २०२३’ ले ‘वाइल्ड स्टे विथ चौँरी’ कार्यक्रमको आयोजना गरेको हो । बिहीबार बिहान धुलिखेलको मिराबेल रिसोर्टमा पञ्चेबाजासहित एड्भेञ्चरको उद्घाटन गरिएको छ । उद्घाटनपछि २ सय भन्दा सहभागितहरु सैलुङ आएका छन् ।
बुधवार विश्व पर्यटन दिवसको अवसरमा क्यानडा, फ्रान्स र स्वीजरल्यान्ड लगायतका देशबाट २२ जनाको टोली सैलुङ क्षेत्रमा पुगिसकेका छन् । पर्यटन दिवसको अवसरमा आएका उनीहरू जङ्गली बसाइ कार्यक्रम सहभागी हुनेछन् ।
प्रचुर पर्यटकीय सम्भावना भएर पनि ओझेलमा परेको सैलुङ प्रवर्धनका लागि कलाकारहरू पनि जङ्गली बसाइ कार्यक्रम सहभागी हुनेछन् । यही असोज १३ गतेसम्म जारी रहने कार्यक्रममा कलाकारहरू निखिल उप्रेती, विजय लामा, प्रेमराजा महत, गरिमा शर्मा, यशकुमार, सन्दीप क्षेत्री, लेखक बुद्धि सागरलगायतका टोली शैलुङ् आउने आयोजकले जनाएको छ ।
शुक्रवार चौँरी गोठ र सैलुङलाई ‘एक्सप्लोर’ गर्ने आयोजकको तयारी छ । कार्यक्रममा आन्तरिक पर्यटनको खोजी गर्ने, चौँरीसँग जङ्गलमा रात बिताउने, स्थानीय संस्कृति, स्वादिष्ट खाना र नयाँ रमणीय ग्रामीण गन्तव्य पत्ता लगाउने इच्छा भएका सहभागीले भाग लिनेछन् ।
