रामेछाप । मन्थली नगरपालिका वडा नम्बर ५ सुनारपानीमा रहेको भैरवी माध्यमिक विद्यालय सुनारपानीका एस.एल.सी प्रथम ब्याच–२०६३ ले विद्यालयका शिक्षकलाई सम्मान गरेको छ । साथै पूर्व विद्यार्थीहरूले अध्ययनरत सोही विद्यालयका विद्यार्थीहरूलाई ट्याक सुट समेत वितरण पनि गरेको छ ।
शनिवार विद्यालयमा एक कार्यक्रम आयोजना गरी पूर्व विद्यार्थी हरूले विद्यालयका नौ जना शिक्षकलाई सम्मान पत्र र मायाको चिनो द्वारा सम्मान गरेको पूर्व विद्यार्थी एवं कार्यक्रम संयोजक चन्द्र प्रकाश आचार्यले जानकारी दिए । आचार्यले २०६३ सालमा एसएलसी दिएका बिद्यार्थीहरु बाट ‘९ जना शिक्षकलाई सम्मान गर्नका साथै २६२ जना विद्यार्थीलाई ट्याक सुट वितरण गरेका जानकारी दिए ।’
सो वडाका वडा अध्यक्ष रविन कार्की (नवीन) सहितको उपस्थितिमा भएको कार्यक्रममा विभिन्न सांस्कृतिक कार्यक्रम, नेपाली हिन्दु धर्मवालम्वी महिलाहरूको हरितालिका तीज, संविधान दिवस २०८० लगायतको शुभकामना समेत आदान प्रदान गरिएको थियो । शिक्षकलाई सम्मान र विद्यार्थीलाई सामाग्री प्रदान गरेर विद्यालयको शैक्षिक गुणस्तर र शिक्षकहरूलाई हौसला प्रदान गर्न पूर्व विद्यार्थी समाजले निकै महत्त्वपूर्ण भूमिका खेलेको भन्दै वडा अध्यक्ष नवीन कार्कीले आगामी दिनहरूमा पनि समग्र वडाको विकासको लागि सबैको साथ र सहयोग पाउनेमा आफू विश्वस्त रहेको बताए ।
