रामेछाप । जिल्ला सदरमुकाम मन्थलीमा सहकारी संस्थाका व्यवस्थापन प्रमुखहरूको बृहत् कार्यशाला गोष्ठी सम्पन्न भएको छ । जिल्ला सहकारी सङ्घको आयोजनामा जिल्ला भरिमा कार्यरत विभिन्न सहकारी संस्थाका व्यवस्थापन प्रमुख हरूका लागि एक दिने कार्यशाला गोष्ठी शनिवार समापन भएको छ ।
सङ्घले सहकारी संस्थाहरूको व्यवस्थापन लाई कसरी वैज्ञानिक र व्यवस्थित बनाउन सकिन्छ र त्यसमा व्यवस्थापक हरूको उत्कृष्ट भूमिकाका बारेमा जानकारी गराउन सकिन्छ भन्ने उद्देश्यले सञ्चालन गरेको कार्यशालामा विभिन्न सहकारी विज्ञहरूले सहभागीहरूलाई सहजीकरण गरेका थिए ।
विभिन्न ४ वटा सेसनमा सञ्चालन गरिएको उक्त कार्यशालामा केन्द्रीय सहकारी सङ्घका प्रमुख कार्यकारी अधिकृत डाक्टर शिवजी सापकोटाले सहकारीको वर्तमान चुनौतीका विषयमा सहजीकरण गरेका थिए । त्यसै गरी सहभागीहरूका लागि थप सहजीकरण नेपाल सहकारी सङ्घ बागमती प्रदेशका सिइओ केशव प्रसाद दाहाल,मिलीजुली कालिन्चोक साकोसका सिइओ ईश्वर न्यौपाने सोही विषयमा जानकारी गराएका थिए ।
उक्त कार्यशालाको उद्घाटन राष्ट्रिय सहकारी महासङ्घ अध्यक्ष मीन राज कँडेलले गरेका थिए । सो अवसरमा कँडेलले जिल्ला सहकारी सङ्घको सक्रियताको तारिफ गर्दे कार्यशाला आम सहकारीहरूको कुशलता र क्रियाशीलताका लागि कोशेढुँगा साबित हुने बताए । कँडेलले कार्यक्रमलाई सम्बोधन गर्ने क्रममा भने – सहकारी नीति विधि र पद्धतिका आधारमा नचल्ने सञ्चालकहरूलाई कुशल व्यवस्थापनले नै अनिवार्य रूपमा तह लाउन सक्नु पर्ने भएकोले पनि कार्यशालाले सार्थकता पाउने विश्वास छ ।
कार्यक्रमलाई सम्बोधन गर्दे केन्द्रीय सहकारी सङ्घका पूर्व अध्यक्ष एवं राष्ट्रिय सहकारी सङ्घका सञ्चालक डिवि बस्नेतले सबै सँगको समन्वयमा सञ्चालन भएको कार्यशाला रामेछापको कुशल सहकारी व्यवस्थापनका लागि महत्त्वपूर्ण हुने बताए । जिल्ला सहकारी सङ्घका अध्यक्ष हिमाल ढुङ्गेलको अध्यक्षतामा भएको कार्यशालामा मन्थली नगर प्रमुख लव श्रेष्ठ, जिल्ला बचत तथा सहकारी संस्थाका अध्यक्ष जेएन दाहाल, नेपाल पत्रकार महासङ्घका अध्यक्ष बद्री नयाँघरे लगायतका वक्ताहरूले कार्यशाला सफलताको शुभकामना दिएका थिए ।
