रामेछाप । जिल्ला अस्पताल रामेछापलाई बागमती प्रदेश सरकार स्वास्थ्य मन्त्रालयले शव वाहन हस्तान्तरण गरेको छ । जिल्ला अस्पतालमा शव वाहन नहुँदा जिल्लाका नागरिकले समस्या झेल्दै आएका थिए । बागमती प्रदेश सरकारले शव वाहन प्राप्त गरे सँगै समस्याको अन्त्य हुने छ ।
शव वाहन बागमती प्रदेश स्वास्थ्य मन्त्रालयले सोमवार जिल्ला अस्पताल विकास समितिका अध्यक्ष यम पाख्रिनलाई हस्तान्तरण गरिसकेको छ । शव वाहन बुधवारसम्म अस्पतालमा आइपुग्ने जिल्ला अस्पताल रामेछापले जानकारी दिएको छ ।
जिल्ला अस्पतालमा शव वाहन नहुँदा शव बोक्नु पर्ने समस्या हुँदै आएको थियो । शव वाहन कै अभावमा भवितव्यमा ज्यान गुमाएका मानिसको शव अस्पतालबाट गन्तव्यमा पु¥याउन सर्वसाधारणले समस्या व्यहोर्दै आएका थिए ।
जिल्लाको विभिन्न ठाउँबाट शव पोस्टमार्टम गर्न अस्पतालसम्म ल्याउन र अस्पतालबाट शव दाहसंस्कारका लागि लैजानसमेत समस्या थियो । डेढ वर्षको प्रयासबाट जिल्ला अस्पताल रामेछापले शव वाहन प्राप्त गरेको अस्पताल विकास समितिका अध्यक्ष पाख्रिनले बताए । जिल्ला अस्पतालमा शव वाहन नहुँदा विभिन्न समस्या भोग्नु परेको भन्दै अब त्यो समस्या हटेको बताए ।
सोमवार प्रदेश मन्त्रालयले जिल्ला अस्पताललाई हस्तान्तरण गरेको शव वाहन मङ्गलवार यातायात कार्यालयमा दर्ता प्रक्रिया पूरा गरी बुधवार जिल्ला अस्पतालमा आइपुग्ने अध्यक्ष पाख्रिनले जानकारी दिए । प्रदेश सरकारबाट प्राप्त शव वाहन सञ्चालनको लागि जिल्लाका सबै स्थानीय तहहरूसँग समन्वय गरेर अघि बढ्ने पाख्रिनको भनाइ छ ।
