रामेछाप । नेपाली काँग्रेसका पार्टी सचिब दिपक खड्काले रामेछापको काँग्रेसको राजनितिमा पार्टी सभापति पूर्णबहादुर तामाङ (कान्छाराम)ले हिलो छ्याप्न सुरु गरेको बताएका छन् । पार्टी सचिव तथा गिरिजा प्रसाद कोइराला फाउन्डेसन जिल्ला समिति रामेछापका जिल्ला अध्यक्ष खड्काले राजनितिमा हिलो छ्याप्न शुरु गरेको भन्दै त्यसो नगर्न आग्रह गरे । गिरिजा प्रसाद कोइराला फाउन्डेसन जिल्ला समिति रामेछापले आयोजना गरेको असार १५, दही चिउरा खाने कार्यक्रममा सचिव खड्काले उक्त कुरा बताएका हुन् ।
सचिव खड्काले भने– आज असार १५, दही चिउरा खाने दीन । आजको दीनलाई धान दिवसको अवसरका रूपमा मनाइन्छ । आजको दीन सानो गरामा धान रोपेर हिलो खेलेर भए पनि रोपाई सुरु गरिन्छ । तर नेपाली काँग्रेस रामेछापका पार्टी सभापतिले आजको दिनबाटै रामेछापको राजनीतिमा हिलो छ्याप्न सुरु गरेका छन् । उहाँ जत्तिको दिग्गज व्यक्तित्व भएको व्यक्तिले हिलो छ्याप्ने काम गर्नु सोभनिय हुँदैन । तसर्थ म आग्रह गर्छु उहाँलाई, राजनीतिमा हिलो छ्याप्ने काम बन्द गर्नुस् ।
त्यस्तै काँग्रेस रामेछापका उपसभापति लेखबहादुर कार्कीले असार १५ दहि चिउरा खाने कार्यक्रम तथा धान दिवस कार्यक्रम गिरिजाप्रसाद कोइराला फाउण्डेशनले खेतमै गएर मनाउन सके अझ राम्रो हुने बताए । कार्कीले भने– यो हाम्रो परम्परा हो । असारमा खेतीपाती नगरे वर्ष भरी के खाने ? तसर्थ किसानको मनोबललाई अझ दह्रो बनाउन यस्ता खाले कार्यक्रम किसान सँगै गएर सञ्चालन गर्नु उपयुक्त हुन्छ । उपसभापति कार्कीले भने ।
त्यस्तै कार्यक्रममा बोल्दै नेपाली काँग्रेसका पूर्व उपसभापति ध्रुवहरि ढुङ्गेलले भने – जति कोइरालाहरू प्रधानमन्त्री बन्नु भयो, उहाँहरूले एउटा आफू बस्ने घर समेत बनाउनु भएन । झनै गिरिजाप्रसाद कोइराला त गरिब किसानका नेता हुन । आफू मर्दा सम्पत्ति शून्य भएका गिरिजाप्रसाद कोइराला बाट राजनीतिक गर्नेहरू पाठ सिक्न जरुरी छ ।
जिपि फाउन्डेसन रामेछापले आयोजना गरेको कार्यक्रममा राजनीतिक दलका नेता तथा कार्यकर्ताहरू,नागरिक समाजका अगुवाहरू, पत्रकारहरू साथै सरोकारवाला व्यक्तिहरूको उपस्थिति रहेको थियो ।
