रामेछाप । खाँडादेवी गाउँपालिकामा पालिकाको आर्थिक वर्ष २०७९÷८० को दोस्रो चौमासिक सार्वजनिक सुनुवाइमा अध्यक्षले प्रहरी प्रयोग गरेका छन् । अध्यक्ष ज्ञानकुमार श्रेष्ठले सार्वजनिक सुनुवाइमा प्रहरी प्रयोग गर्दै स्थानीय नागरिकलाई प्रश्न गर्न नदिएपछि सार्वजनिक सुनुवाइ कार्यक्रममा झडप समेत भएको छ ।
सार्वजनिक सुनुवाइ जस्तो स्थानमा प्रहरी प्रयोग गर्ने र प्रश्न गर्न समेत नदिने गरेपछि अवस्था खाँडादेवी गाउँपालिकाको सार्वजनिक सुनुवाइ कार्यक्रम तनावग्रस्त बनेको हो । पालिका अध्यक्ष श्रेष्ठले पूर्वाग्रह राखेर वडालाई छुटाएको बजेट कटौती गरेपछि वडाका नागरिकहरू आक्रोशित भएका हुन् ।
गाउँपालिकाको रातो किताबमा रहेको बजेट समेत वडा अध्यक्ष काँग्रेस बाट निर्वाचित भएको भन्दै कटौती गरेको स्थानीयको आरोप छ । अध्यक्ष श्रेष्ठले पूर्वाग्रह राखेर वडालाई छुटाएको बजेट कटौती गरेको विषयमा प्रश्न गर्न नदिएपछि आक्रोशित भएको भिडले अध्यक्ष श्रेष्ठलाई बोतल प्रहार गरेका हुन् । रातो किताबको ३० लाख बजेट उपभोक्ता समितिले गर्ने गरी वडाले सिफारिस गरेको भए पनि पालिका अध्यक्ष श्रेष्ठले सम्झौता नगरिदिएको वडा नं ६ का वडा अध्यक्ष नारायण कार्कीले जानकारी दिए ।
