रामेछाप । मन्थली सहिद स्मृति बहुमुखी क्याम्पसको स्ववियु निर्वाचनमा संयुक्त गठबन्धनको तर्फबाट उम्मेद्वारी दर्ता गराएको अविनाश कार्कीको प्यानलले प्रतिवद्धता पत्र सार्वजनिक गरेको छ । चैत्र ५ गते हुने स्ववियु निर्वाचनमा नेपाली कांग्रेस निकट बिद्यार्थी संगठन (नेविसंघ) नेकपा माओवादी केन्द्र निकट विद्यार्थी संगठन( अखिल क्रान्तिकारी) नेकपा समाजवादी निकट बिद्यार्थी संगठन अनेरास्ववियुको तर्फ बाट स्ववियु सभापतीका उमेरदवार बनेका कार्कीको समुहले विहिबार सदरमुकाम मन्थलीमा पत्रकार सम्मेलन गरी गठबन्धनको प्यानलले निर्वाचन जितेमा आगामी कार्यकालमा गर्ने काम सहितको प्रतिवद्धता पत्र सार्वजनिक गरेको हो ।
प्रतिवद्धता पत्र सार्वजनिक कार्यक्रममा बोल्दै नेपाली काँग्रेस रामेछापका जिल्ला सदस्य दिपेन्द्र खड्काले नेपालको शिक्षालाई गुणस्तरीय शिक्षा बनाउनको लागि नेविसंघको नेतृत्वमा रहेको संयुक्त गठबन्धनलाई जिताउन आवश्यक रहेको बताए । उनले मन्थली सहिद स्मृति बहुमुखी क्याम्पसको स्ववियु निर्वाचनमा संयुक्त गठबन्धनको जित निश्चित रहेको प्रतिक्रिया दिदैँ आगामी दिनमा मन्थली सहिद स्मृति बहुमुखी क्याम्पसमा शैक्षिक गुणस्तर र विद्यार्थीहरुको हकहितमा काम हुने धारणा व्यक्त गरे ।
त्यस्तै नेकपा माओवादी केन्द्र बागमती प्रदेश कमिटी सदस्य शिशिर खड्गीले अहिलेको आवश्यकता नै गठबन्धनको भएको बताउँदै चैत्र ५ गते हुने स्वतन्त्र विद्यार्थी युनियनको निर्वाचनमा पनि गठबन्धनले जित्ने दावी गर्दै स्ववियुमा भएको गठबन्धनले शिक्षा क्षेत्रमा आमुल परिवर्तन गर्ने बताए ।
कार्यक्रममा नेपाल विद्यार्थी संघ रामेछापका अध्यक्ष विनोद बुढाथोकी, अखिल क्रान्तिकारी केन्द्रीय सदस्य भिष्माराज चौलागाई, नेपाल पत्रकार महासंघ बागमती प्रदेशका कोषाध्यक्ष रमेश ढुंगेल, नेपाल पत्रकार महासंघ रामेछापका अध्यक्ष बद्री नयाँघरे लगायतले धारणा राखेका थिए ।
प्रतिवद्धता पत्र सार्वजनिक गर्दै संयुक्त गठबन्धनको तर्फबाट उम्मेद्वार रहेका अविनाश कार्कीले स्वतन्त्र विद्यार्थी युनियनले देशको गुणस्तरीय शिक्षाको लागि खेलेको भूमिका महत्वपूर्ण रहेको उल्लेख गर्दै विगत देखि खेलेको भूमिकालाई निरन्तरता दिने प्रतिवद्धता जनाउँदै आगामी दिनमा आफूहरु विद्यार्थीकै हकहितमा काम गर्ने बताए ।
संयुक्त गठबन्धनको तर्फबाट सार्वजनिक भएको प्रतिवद्धता पत्रमा आधुनिक प्रविधि युक्त कक्षाकोठा निर्माणमा पहल गरिनेदेखि अनलाइन सिकाइलाई व्यवस्थित र नियमित बनाइने प्रतिवद्धता पत्रमा उल्लेख छ । त्यस्तै दलित, जेहेन्दार, गरिव, अशाह्य तथा अशक्त विद्यार्र्थीहरुको लागि उचित छात्रवृत्तिको व्यवस्था गरिने पनि प्रतिवद्धता पत्रमा उल्लेख गरेका छन् ।
