रामेछाप । जिल्लामा कृषि बीमा गराउने केही इन्सुरेन्स कम्पनीले काम गर्न थालेको केही वर्ष भएता पनि रामेछापको किसानहरुकाे भने उक्त कृषि बीमा प्रति आकर्षण बढ्न सकेको छैन ।

यसअघि कृषि बीमा गरेका किसानहरुले बीमा दावी गर्न जाँदा प्रक्रिया झन्झटिलो भएकै कारण कृषि बीमा प्रति किसानहरुको आकर्षण बढ्न नसकेको हो । सरकारले बालीनाली र पशुपालनमा लागेका किसानहरुले व्यहोर्नुपर्ने सम्भावित क्षतीको जोखिम कम गर्न कृषि बीमा कार्यक्रम लागु गरेको लामो समय भएता पनि त्यसको कार्यान्वयन भने खासै देखिएको छैन ।

कृषि बीमा गर्न इच्छुक किसानलाई बिमाङ्कको ८० प्रतिशत रकम सरकारले नै व्यहोर्ने गरेको छ भने २० प्रतिशत रकम स्वयं किसानले व्यहोर्नुपर्ने छ । यतिधेरै रकम सरकारले व्यहोर्ने भएता पनि किसानहरुको यसतर्फ खासै आर्कषण देखिएको छैन । केही किसानहरुले यसअघि गरेको बीमा रकम लिन गर्नुपर्ने प्रक्रिया झन्झटिलो भएका कारण यसतर्फ आफुहरुको आर्कषण कम भएको मन्थली नगरपालिका–५ सुनारपानीका किसान रुद्रवहादुर कार्कीले जानकारी दिए ।

उनले भने– थोरै खेतीयोग्य जमीनमा लगाएको बालीको इन्सुरेन्स कम्पनीले बीमा गर्नै नमान्ने रहेछन् । आफ्नो जग्गामा खेती गर्दै आएको बालीको बीमा गर्ने होनी ? जग्गा थोरै भएकाले बीमा कम्पनीहरुले बीमा गर्नै नमान्ने समस्या रहेको छ । उनीहरुलाई धेरै जग्गामा खेती गरेको हुनुपर्ने रे ? आफ्नो जग्गा नै थोरै छ के गर्नु ! त्यसैले अहिलेसम्म बीमा गरेको छैन, कार्कीले बताए ।

जिल्लामा धेरै कृषी बीमा गर्ने कम्पनीहरु भएता पनि उनीहरुले सोचेजती काम गर्न नसकेको एनएलजी इन्सुरेन्स कम्पनी रामेछापका प्रमुख मोहन धमालाले जानकारी दिए । उनले भने– जिल्लामा व्यवसायीक खेती गर्ने भन्दा वढी निवार्ह मुखी भएका कारण समस्या रहेको छ । अर्कोतिर थोरै खेती गर्ने किसानले बीमा गर्न झन्झटिलो छ । जिल्लामा प्राविधिक जनशक्तीको कमी छ । त्यसैले केही किसानले बीमा गरे पनि प्राविधिक काठमाण्डौंदेखी झिकाउनु पर्ने वाध्यता रहेकाले हामीले पनि त्यति धेरै चासो दिएका छैनौं प्रमुख धमालले बताए ।

केही किसानले १÷२ रोपनी जग्गामा गरेको तरकारी खेतीको बीमा गरेता पनि उक्त खेती रोगले नष्ट पारेपछि बीमा दाबी गर्न जाँदा बीमा गरेको भन्दा बढी पैसा खर्च हुने देखिएपछि किसानहरु बीमा प्रति आर्कषण घटेको हो । किसानलाई कृषी बीमा तर्फ आर्कषण बढाउन जनचेतना जिल्लाको सबै स्थानिय तहको गाउँगाउँसम्म पुर्याउन सके बीमा गर्ने किसानको संख्यामा बृद्धि हुनसक्ने किसानहरु बताउँछन् ।