रामेछाप । गोकुलगंगा गाउँपालिकाले आयोजना गरेको ‘तेस्रो राष्ट्रपति रनिङ शिल्ड’ को उपाधी गोकुलगंगा माविले हात पारेको छ । गोकुलगंगा गाउँपालिका वडा नम्बर ३ रस्नालुमा रहेको गोकुलगंगा माविले ९ स्वर्ण, २ रजत र ४ कास्य पदक जित्दै राष्ट्रपति रनिङ शिल उचालेको हो । साथै गोकुलगंगा माविले शिल्ड, ट्रफि, मेडल र प्रमाणपत्र पाएको छ । त्यस्तै वडा नं २ ठोसेमा रहेको सारादा मावि ले ५ स्वर्ण, ७ रजत र ६ कास्य सहित दोस्रो हुँदै ट्रफि, मेडल र प्रमाणपत्र पाएको छ । वडा नं ४ बेतालीमा रहेको जनजागृति माविले ५ स्वर्ण, ४ रजत ४ कास्य सहित तेस्रो स्थान कायम गरेको छ । उसले पनि ट्रफि, मेडल र प्रमाणपत्र पाएको छ ।
वडा नम्बर ५ नमाडीमा रहेको कमलादेवी माविले ४ स्वर्ण, ३ रजत, र २ कास्य पदक जित्दै सान्त्वना भएको छ । विजयी खेलाडीहरूलाई सोही पालिकाका स्थानीय समेत रहेका नेपाली काँग्रेसका जिल्ला सभापति एवं प्रतिनिधि सभाका सांसद पूर्णबहादुर तामाङ (कान्छाराम) ले पुरस्कार प्रदान गरेका छन् ।
गत बिहीबार वाट सुरु भएको तेस्रो राष्ट्रपति रनिङ शिल्ड प्रतियोगितामा पालिका भित्रका सबै माविले सहभागिता जनाएका थिए ।
गत बिहीबार बागमती प्रदेशका प्रदेश सभा सदस्य तारानारायण श्रेष्ठ (बिगुल) ले खेलको उद्घाटन गरेका थिए ।