रामेछाप । जिल्ला प्रशासन कार्यालय रामेछापले राहादानी लिन आउने सेवाग्राहीलाई सहज होस् भन्ने उद्धेश्यले निःशुल्क अनलाइन फाराम भर्ने सुविधा उपलव्ध गराएसँगै नागरिकमा खुशी छाएको छ ।
यो सुबिधा उपलव्ध गर्ने जिल्ला प्रशासन कार्यालयरामेछाप देशभरमा पहिलो हो । राहादानी अनलाइन फाराम र राष्ट्रिय परिचय पत्र फाराम भर्न कम्प्युटर इन्ष्टिच्युटमा जाँदा व्यसायीले मनलाग्दी शुल्क लिदा आफुहरु मारमा पर्दै आएका थिए । ढिलै भएपनि जिल्ला प्रशासन कार्यालयले राहादानी अनलाइन फाराम भर्न निःशुल्क गरेर रामेछापका नागरिकको मन जित्न सफल भएको मन्थली नगरपालिका–१ का डोर प्रसाद घिमिरेले जानकारी दिए । उनले भने– प्रशासनको यो कामले सिङ्गो रामेछापका नागरिकहरु खुशि छौं ।
सेवाग्राहीले राहादानी लिनु पुर्व अनलाइन फाराम अनिर्वाय भर्नुपर्ने बाध्यकारी नियम भएकाले उक्त फाराम भर्दा व्यवसायीहरुले सेवाग्राहीसँग मनलाग्दी रुपमा चर्को शुल्क लिदै आएका थिए । बढी शुल्क लिएको भन्ने जनगुनासो बढ्दै गएपछि जिल्ला प्रशासन कार्यालय रामेछापले कार्यालयमा अनलाइन फाराम भरिदिने व्यवस्था मिलाएको हो । यसअघि जिल्ला प्रशासन कार्यालयले अनलाइन फाराम भर्ने काम गरेको थिएन ।
राहादानी लिन जाने सेवाग्राहीले बाहिर वजारमा रहेका कम्प्युटर इन्ष्टिच्चुटवाट राहादानी अनलाइन फाराम भरेर मात्रै सिफारिस लिन जिल्ला प्रशासन कार्यालय जाने गर्दथे । वजारमा रहेका कम्प्युटर इन्ष्टिच्युका संचालकहरुले सेवाग्राहीसँग ३ सय देखी १५ सय रुपैयाँसम्म रकम लिएको गुनासो सेवाग्राहीले गरेपछि जिल्ला प्रशासन कार्यालयले उक्त कार्यमा रोक लगाएको जिल्ला प्रशासन कार्यालय रामेछापका प्रमुख जिल्ला अधिकारी शोभाखर रेग्मीले जानकारी दिए ।
उनले भने– कार्यालयमा सेवा लिन आउने सेवाग्राहीले यसअघि कसैले पनि कम्प्युटर इन्ष्टिच्युटले बढी रकम लिएको भन्ने गुनासो गरेका थिएनन । केही दिन अघि धेरै सेवाग्राहीले कम्प्युटर इन्ष्टिच्युटका संचालकबाट आफुहरु ठगिएको भन्दै गुनासो गरेपछि प्रशासनले व्यवासीले व्यवसाय दर्ता गर्दा राहादानी अनलाइन फाराम र राष्ट्रिय परिचय पत्र विवरण भर्न पाउने गरि व्यवसाय दर्ता नगरि नियम विपरित कार्य गरेको अनुगमनको क्रममा भेटिएकाले तत्काल उक्त कार्य रोकेका हौं । अब राहादानी लिन आउने सेवाग्राहीले सिधै जिल्ला प्रशासन कार्यालयमा आएर निःशुल्क फाराम भर्न मिल्ने व्यवस्था मिलाएका छौं, यो देशभरमा पहिलो हो प्रजिअ रेग्मीले बताए ।
प्रशासनमा नै निःशुल्क अनलाइन फाराम भर्ने नाममा व्यवसायीलाई मात्र हैन सेवाग्राहीलाई समेत मारमा पार्ने काम गरेको संयोग इन्ष्टिच्युट एण्ड रिर्सच सेन्टरका संचालक नवराज श्रेष्ठले जानकारी दिए । उनले भने–प्रशासनले नियमित काम गर्नै सक्दैन, केही दिनको लागि मात्रै हो । प्रशासनले गरेको कामले सेवाग्राहीले सहज हैन झनै दुःख पाएका छन् । अनलाइन फाराम भर्ने नाममा दिनभर लाइनमा वस्नु पर्ने वाध्यता एकातिर छ भने अर्कोतिर राजश्व भौचर आफैले भर्नुपर्ने हुँदा सेवाग्राहीलाई झनै समस्या भएको आरोप व्यवसायी श्रेष्ठले लगाए ।
जिल्ला प्रशासन कार्यालयमा मन्थली नगरपालिकाको सहयोगमा एउटा डेक्स स्थापना गरि त्यही डेस्कबाट राहादानी अनलाईन फाराम भरिदै आएको छ । तत्काल उमाकुण्ड गाउँपालिकासँग समन्वय गरि एकहप्ता भित्र अर्को डेस्क स्थापना गरि नागरिकलाई पालो कुर्नु पर्ने वाध्यतावाट मुक्ती दिने गरि गृह कार्य थालिएको पनि जिल्ला प्रशासन कार्यालय रामेछापका सहायक प्रमुख जिल्ला अधिकारी अनोजकुमार घिमिरेले जानकारी दिए ।
उनले भने– अनलाइन फाराम मात्रै हैन केही दिनभित्र राजश्व रकमको फर्म कार्यालयवाट नै भर्ने गरि व्यवस्थापन भइसकेको र उक्त कार्य सम्भवत आइतवारवाट शुरुवात गर्ने छौं । अनलाइन फाराम भर्दा राहादानी विभागको सरबरमा बढी लोड हुनपुग्दा कतिपय समय सेवाग्राहीले कुर्नुपर्ने वाध्यता रहेको छ । राहादानी विभागमा देशभरवाट अनलाइन डाटा इन्ट्रि गर्नुपर्दा बिहान ११ वजेदेखी दिउँसो ३ वजेसम्म डाटा स्लो चल्ने समस्या रहेकाले यसलाई तत्काल सुधार गर्न तालुके कार्यालयसँग समन्वय भइरहेको पनि सहायक प्रजिअ घिमिरेले बताए ।
