रामेछाप । मुख्य निर्वाचन कार्यालयमा खटिएका कर्मचारीको कमजोरीका कारण कोठाभित्र राखिएको एउटा (बाकस) मतपेटिका खोज्नै दुई घण्टा समय खर्चिदा रामेछापको मतपरिणाम सार्वजनिक हुन अझै दुई हप्ता मतदाताले कुर्नुपर्ने देखिएको छ ।
मुख्य निर्वाचन कार्यालय रामेछापले कार्यालयभित्र भण्डारण गरेको मतपेटिका भद्रगोल तरिकाले भण्डारण गर्दा एउटा पालिकाको कुनै एक वडाको मत पेटिका खोज्न मतगणनामा खटिएका कर्मचारीले करिव दुई घण्टा समय लगाउने गरेका छन् । अर्कोतिर एउटा प्रतिनिधिसभा र दुई वटा प्रदेशसभाको मतगणना एकै पटक नगर्दा आम रामेछापका मतदाताले आफुले मतदान गरेको उम्मेदवारको मत कती आयो भन्ने सूचना समेत पाउन नसकेको रामेछाप नगरपालिका–७ सुकाजोरका हरिवहादुर बस्नेतले जानकारी दिए ।
उनले भने– मुख्य निर्वाचन कार्यालयमा खटिएका मुख्य निर्वाचन अधिकृत देखी तल्लो स्तरका कर्मचारीसम्म मतदानको परिणाम चाडो सार्वजनिक गर्नु भन्दा मत गन्न जति दिन धैरे लगायो उती दिनको दैनिक भत्ता बढी आउँछ भन्ने हिसावले काम गर्दा रामेछापको मत परिणाम आउँन ढिला भएको बस्नेतले आरोप समेत लगाए ।
मंसिर ४ गते आइतवार सम्पन्न भएको मतदानका सबै मतपेटिकाहरु सोमवार बिहान ९ः३० वजे भित्रै सम्वन्धीत मतदान अधिकृतहरुले मुख्य निर्वाचन कार्यालयमा बुझाईसकेका थिए । कार्यालयमा मतपेटिका बुझेका मुख्य निर्वाचन अधिकृतले तत्काल सर्वदलिय बैठक बोलाएर मतगणना शुरु गर्नुपर्नेमा मतपेटिका भण्डारण गरी आराम गर्छु भन्दै मुख्य निर्वाचन अधिकृत इन्दिरा शर्मा कार्यालयवाट बाहिरिएसँगै मतगणना शुरु हुन सकेको थिएन ।
सोमवार साँझ सर्वदलिय बैठक राखेर सोही दिन राती ९ः३० वजेवाट शुरु भएको मतगणना तीनदिन लगाएर एउटा उमाकुण्ड गाउँपालिकाको मात्र सम्पन्न भएको छ । अहिले भएको मतगणनाको अवस्था हेर्दा जिल्लाका २ नगरपालिका र ५ वटा गाउँपालिकाको मतगणना सम्पन्न गर्न अझै दुईहप्ता भन्दा बढी समय लाग्ने देखिएको नागरिक समाज रामेछापका अगुवा हिमाल ढुंगेलले बताए ।
उनले भने– मुख्य निर्वाचन कार्यालय रामेछापले मतगणना प्रति धेरै चासो नदेखाउँदा समयमा परिणाम आउन नसक्ने ठोकुवा गरे । कार्यालयको भवनमा कोठाहरु प्रयाप्त हुँदाहुँदै पनि मुख्य निर्वाचन कार्यालयले थोरै कर्मचारी राखेर मतगणना गर्दा समयमा मतपरिणाम आउन नसक्ने भएकाले कर्मचारी थप गरि मतगणना स्थल बढाउनुपर्ने ढुंगेलले बताए ।
यता निर्वाचनमा होमिएका मुख्य प्रतिस्पर्धी दलका उम्मेदवार र दलका नेताहरुले समेत मतगणना चाडो सक्न मुख्य निर्वाचन अधिकृत र कर्मचारीहरुलाई दवाव दिन सकेका छैनन् । मतगणना स्थलमा पुगेका उम्मेदवार र तीनका प्रतिनिधिहरु मध्ये लोकतान्त्रीक गठवन्धनका उम्मेदवारहरु निर्वाचन जितिहालिन्छ बिस्तारै मत गन्दा नी के हुन्छ र भन्ने उनीहरुमा एक किसिमका हुटहुटी जागेको छ ।
यता प्रतिस्पर्धी दल नेकपा एमाले र अन्य साना दलका उम्मेदवारहरु र तीनका प्रतिनिधिहरु मतगणनाको परिणाम विस्तारै आएपनि केही छैन भन्दै बस्ने गरेकाले रामेछापको मतपरिणाम आउन ढिलो हुने देखिएको हो । रामेछापका राजनितिक दलका नेताहरु र उम्मेदवारले चासो नदेखाउँदा मतपरिणाम समाचार सुन्न प्रतिक्षामा बसेका आम मतदातामा नैराश्यता छाएको मन्थली नगरपालिका–१ का कुमार श्रेष्ठले जानकारी दिए ।
कार्यालयमा ठाउँको अभाव भएकाले चार स्थानमा मात्रै मतगणना हुँदा धेरै समय लागेको मुख्य निर्वाचन अधिकृत इन्दिरा शर्माले जानकारी दिइन । उनले भनिन्– प्रयाप्त ठाउँ नहुँदा मतगणनाको परिणाम आउन समय लागेको बताइन ।
जिल्लामा कुल १ लाख ८० हजार १ सय ६ जना मतदाताहरु मध्ये ८८ हजार ९ सय ३३ जना मतदाताले मतदान गरेका थिए । मुख्य निर्वाचन कार्यालय रामेछापले बुधवार बिहान ११ वजेसम्म जम्मा ११ हजार ९ सय ८५ मतको गणना मात्रै सकेको छ ।
