रामेछाप । प्रतिनिधिसभा सदस्य एवं प्रदेशसभा सदस्य पदमा रामेछापमा मतदान कार्य जारी रहेको र हालसम्म ४५ प्रतिशत मत खसेको छ ।
आज बिहान ७ वजेदेखी शुरु भएको निर्वाचनमा जिल्लाभरका ९६ वटा मतदान स्थल र २२६ वटा मतदान केन्द्रमा मतदान भइरहेको र दिउँसो ३ः३० वजेसम्म सरदर ४५ प्रतिशत मत खसेको रामेछापका प्रमुख जिल्ला अधिकारी शोभाखर रेग्मीले जानकारी दिए । उनका अनुसार– जिल्लाका केही अति संवेदनशिल भनिएका मतदान स्थलमा केही समय मतदाता विच हो–हल्ला भएता पनि मतदान प्रक्रिया भने नरोकिएको प्रजिअ रेग्मीले बताए ।
जिल्लाभर मतदान स्थलको सुरक्षा व्यवस्था अत्यन्त कडा पारिएकाले जिल्लाभरका आम मतदाताहरुले निर्धक्क भएर आफ्नो अमुल्य मत उम्मेदवारहरुलाई प्रदान गर्न समेत प्रजिअ रेग्मीले मतदातासँग आग्रह गरे । मतदान स्थलमा हुनसक्ने घटनालाई मध्यनजर गरी ठाउँठाउँमा नेपाली सेनाको टोली राखिएकोले कुनै पनि अप्रिय घटना हुनसाथ १५ मिनेट भित्रै उक्त टोली घटनास्थल पुग्ने गरि सुरक्षा व्यवस्था मिलाइएको पनि प्रजिअ रेग्मीले जानकारी दिए ।
जिल्लामा प्रतिनिधिसभा सदस्यमा १ महिला सहित २२ जना र प्रदेशसभा सदस्यमा २३ जना उम्मेदवारहरु प्रतिस्पर्धामा रहेका छन् । प्रतिस्पर्धी उम्मेदवारहरुलाई रामेछापका कुल १ लाख ८० हजार १ सय ६ जना मतदाताहरुले मतदान गर्दै छन् ।
