रामेछाप । नेकपा एमालेले संचालन गर्दै आएको चुनावी कार्यक्रममा सरकारी गाडी लिएर साँघुटार चुनावी सभामा पुगेका खाँडादेवी गाउँपालिकाका अध्यक्ष ज्ञानकुमार श्रेष्ठले प्रयोग गर्दै आएको गाडी प्रहरीले नियन्त्रणमा लिएको छ ।
एमालेको बिहिवार हुने चुनावी कार्यक्रममा अध्यक्ष श्रेष्ठले प्रयोग गर्दै आएको बा २ झ ३४१५ नम्वरको सरकारी गाडी लिएर उनी रामेछाप नगरपालिकाकाे साँघुटार पुगेका थिए । एउटा पार्टीको कार्यक्रममा गाउँपालिकाका अध्यक्ष जस्तो पदमा बसेका श्रेष्ठले आफ्नो पदिय मर्यादालाई कुल्चदै सरकारी गाडीको दुरुपयोग गरेको भन्ने सूचना स्थानियले प्रहरीमा दिएसँगै प्रहरीले साँघुटार वजारवाट उक्त गाडी नियन्त्रणमा लिएको जिल्ला प्रहरी कार्यालय रामेछापका प्रवक्ता राजु प्रसाद ढकालले जानकारी दिए ।
उनले भने–एमालेको चुनावी कार्यक्रममा कार्यकर्ता बोकेर अध्यक्षले सरकारी गाडीको दुरुपयोग गरेको भन्दै धेरै नागरिकहरुले प्रहरीमा उजुरी गरेपछि प्रहरीले उक्त गाडी नियन्त्रणमा लिएको छ । अहिले उक्त गाडी प्रहरी चौकी साँघुटारमा राखिएको र यस बिषयमा थप अनुसन्धान भइरहेको बताए ।
अध्यक्ष श्रेष्ठले एमालले जिल्लामा संचालन गरेको चुुनावी कार्यक्रम शुरु भएदेखी नै सरकारी साधनको प्रयोग गर्दै आएका थिए । यसवारेमा स्थानिय नागरिकले प्रहरी चौकीहरुमा खवर गर्दा समेत प्रहरीले सवारीसाधन नियन्त्रणमा लिएको थिएन । एउटा पार्टीको चुनावी कार्यक्रममा सरकारी सवारीसाधन प्रयोग गरेर अध्यक्ष श्रेष्ठले पालिकाको नै बेइज्यत गरेको एक स्थानियले बताए ।
यता निर्वाचन आयोगले जनप्रतिनिधिहरुलाई आफ्नो पालिकामा हिड्न पाउने तर कुनै पनि राजनितिक दललाई मत माग्न नपाउने साथै सरकारी साधनको समेत प्रयोग गर्न नपाउने निर्देशन गरेको छ । श्रेष्ठले भने निर्वाचन आयोगको निर्देशनलाई समेत वेवास्था गर्दै आफ्नो पालिका र जिल्लाभर नेकपा एमालेको चुनावी कार्यक्रममा सरकारी गाडीको दुरुपयोग गर्दै आएका छन् ।
