रामेछाप । सडक र यातायातको पहुँच नहुँदा पैदल हिडेर बैंकसम्म पुग्न नसक्ने सुनापति गाउँपालिका–१ गुन्सीका जेष्ठ नागरिकहरुलाई सामाजिक सुरक्षा भत्ता घरघरमै पुगेर दिएपछि जेष्ठ नागरिक खुशीले दङ्ग भएका छन् ।
ग्रामिण भेगमा कच्ची सडकले छोएता पनि ती रुटमा नियमित यातायातका साधनहरु संञ्चालन हुन नसक्दा बैकंसम्म पैदल हिडेर पुग्न नसक्ने जेष्ठ नागरिकहरुलाई सुविधा पुगोस् भन्ने उद्धेश्यले सामाजिक सुरक्षा भत्ता बोकेर कर्मचारी सहित वडा अध्यक्ष ध्रुव चौलागाई घरघरमा पुगेर भत्ता रकम वितरण गरेसँगै जेष्ठ नागरिकहरु खुशिले गद्गद् भएका हुन् ।
शारिरिक अस्वस्थता भएका जेष्ठ नागरिक, अपाङ्गता भएका व्यक्ति, एकल महिला र दलितलाई उनीहरुले पाउने सामाजिक सुरक्षा भत्ता घरघरमै लगेर बितरण गरिएको हो । शारिरिक रुपमा अस्वस्थ भएका जेष्ठ नागरिकहरुलाई सजहता प्रदान गर्न वडा कार्यालयले सुनापति गाउँपालिकामा रहेको सिटिजन बैंकसँग समन्वयमा उक्त रकम घरघरमै पुर्याइएको हो ।
स्थानिय तहको निर्वाचनको समयमा नागरिकहरुको घरघरमा मत माग्न जाँदा आफुले निर्वाचन जिते जेष्ठ नागरिकहरुलाई घरघरमै सामाजिक सुरक्षा भत्ता ल्याईदिने बचन दिएकाले आफु निर्वाचित भएसँगै जेष्ठ नागरिकहरुसँग गरेको वाचा पुरा गर्न भत्ता रकम घरघरमै पुर्याएको सुनापति गाउँपालिका–१ गुन्सीका वडा अध्यक्ष ध्रुव चौलागाईले जानकारी दिए ।
उनले भने– जेष्ठ नागरिकहरु पैदल हिडेर बैंकसम्म जानसक्ने अवस्थामा हुनुहुन्न । भत्ता रकम लिनकै लागि कतिपय डोकोमा बोकिएर जानुपर्ने वाध्यता थियो । बैंकसम्म पुग्न घण्टौं पैदल हिड्नुपर्ने समस्या एकातिर छ अर्कोतिर बैंक पुग्दा पनि पैसा झिक्न घण्टौं लाइनमा बस्नुपर्ने वाध्यता रहेको छ । जसले यी दुवै समस्या हल गर्न आफुले बैंकसँग सहकार्य गरेर पैसा लिएर घरघरमै पुगेर रकम वितरण गरेका हौं ।
